International Udhayam

നിങ്ങള്‍ ഉത്കൃഷ്ട സമൂഹമാണ്, നന്മ കല്‍പ്പിക്കുകയും തിന്മ വിരോധിക്കുകയും ചെയ്യുന്ന സമൂഹം."...

Wednesday, April 3, 2019

വിമോചനത്തിന്റെ കൈകള്‍‌ക്ക്‌ ശക്തി പകരുക

ഇന്ത്യയിലെ പതിനേഴാം ലോക സഭയെ തിരഞ്ഞെടുക്കാനുള്ള പൊതുതിരഞ്ഞെടുപ്പ് 2019 ഏപ്രിൽ മെയ് മാസങ്ങളിൽ നടക്കാൻ പോവുകയാണ്.ഇതോടൊപ്പം തന്നെയാണ് ആന്ധ്രാപ്രദേശ്‌, അരുണാചൽ പ്രദേശ്, ഒഡീഷ, സിക്കിം എന്നീ സംസ്ഥാന നിയമസഭയിലേക്കുമുള്ള തിരഞ്ഞെടുപ്പുകൾ നടക്കുന്നത്.543 അംഗങ്ങളെയാണ് 543 ലോകസഭാ മണ്ഡലങ്ങളിൽ നിന്നായി ലോക്‌സഭയിലേക്ക് വോട്ട് ചെയ്ത തിരഞ്ഞെടുക്കുന്നത്.ഇതിനു പുറമെ രണ്ടു പേരെ രാഷ്ട്രപതി നാമനിർദ്ദേശം ചെയ്യുകയും ചെയ്യുന്നു.

രാജ്യത്തിന്റെ വിമോചനത്തിന്റെ കൈകള്‍‌ക്ക്‌ ശക്തി പകരാന്‍ ജനാധിപത്യ വിശ്വാസികള്‍ ബാധ്യസ്‌തരാണ്‌.'ഒരു ജനം സ്വന്തം അവസ്ഥയെ സ്വയം പരിവര്‍‌ത്തിപ്പിക്കുന്നതുവരെ ദൈവം അവരുടെ അവസ്ഥയെ പരിവര്‍‌ത്തിപ്പിക്കുന്നില്ല'.

അഥവാ വര്‍‌ത്തമാന കാല രാജ്യത്തെ അവസ്ഥയായാലും രാജ്യാന്തര അവസ്ഥാ വിശേഷങ്ങളായാലും കാരണക്കാര്‍ സമൂഹം തന്നെയത്രെ.

പ്രത്യക്ഷത്തില്‍ ലോകം സാക്ഷിയായിക്കൊണ്ടിരിക്കുന്ന വര്‍‌ത്തമാനങ്ങളില്‍ അഭിരമിക്കുന്നതിനു പകരം നന്മയുടെ വക്താക്കള്‍‌ക്ക്‌ ചില ബാധ്യതകള്‍ ഉണ്ട്‌.'ഒരു ജനത്തിനു നല്‍‌കിയ യാതൊരനുഗ്രഹവും ആ ജനം തങ്ങളുടെ കര്‍‌മ രീതി സ്വയം മാറ്റുന്നതുവരെ ദൈവം മാറ്റുന്നതല്ല.'എന്ന ധാര്‍മ്മികമായ അധ്യാപനത്തില്‍ അതി ഗൗരവമുള്ള പാഠം നാം ഉള്‍‌കൊള്ളാതെ പോകരുത്.

ക്ഷേമ രാഷ്‌ട്ര സങ്കല്‍‌പ്പത്തില്‍ നിലവില്‍ വന്ന രാഷ്‌ട്രിയ സം‌വിധാനം വൈകാരികതകള്‍‌ക്കപ്പുറം വൈചാരിതകള്‍‌ക്കാണ്‌ പ്രാമുഖ്യം നല്‍‌കാറുള്ളത്.പുതുതായി രൂപീകരിക്കപ്പെട്ട പാര്‍‌ട്ടിയെക്കുറിച്ചല്ല ഇപ്പോഴത്തെ നമ്മുടെ ചിന്ത മറിച്ച്‌ നമ്മുടെ രാജ്യത്തെ കുറിച്ചാണ്‌.ഫാഷിസത്തെ തൂത്തെറിയുക എന്ന ഒരേ ഒരു ചിന്തക്ക്‌ മാത്രമേ 'ഈ ജീവന്‍ മരണ തെരഞ്ഞെടുപ്പ്‌ പോരാട്ടത്തില്‍' പ്രസക്തിയുള്ളൂ.

എന്തൊക്കെ അപജയങ്ങള്‍ ഉണ്ടായാലും ഇന്ത്യയുടെ സ്വാതന്ത്ര്യ സമര പോരാട്ട ചരിത്രത്തില്‍ തുല്യതയില്ലാത്ത സ്ഥാനമുള്ള പാര്‍ട്ടിയാണ്‌ ഇന്ത്യന്‍ നാഷണല്‍ കോണ്‍‌ഗ്രസ്സ്‌.ഈ സന്നിഗ്‌‌ദ ഘട്ടത്തില്‍ ബുദ്ധിപൂര്‍‌വമുള്ള തീരുമാനം തന്നെയാണ്‌ വെല്‍‌ഫയര്‍ രാഷ്‌ട്രീയ മുന്നേറ്റം കൈകൊണ്ടിട്ടുള്ളത്.ക്ഷേമ രാഷ്‌ട്ര സങ്കല്‍പമുള്ള ഈ പാര്‍ട്ടിയുടെ പ്രവര്‍‌ത്തനങ്ങളിലെ ചൂടും ചൂരും മുമ്പെന്നത്തെക്കാള്‍ സര്‍‌ഗാത്മകമായി പ്രചരിപ്പിക്കാനും പ്രസരിപ്പിക്കാനും ഈ തെരഞ്ഞെടുപ്പ്‌ കാലം ഉപകാരപ്പെടുന്നുണ്ട്‌ എന്നതും വിസ്‌മരിക്കാവതല്ല.

നാട്ടിലെ രാഷ്‌ട്രീയ പ്രവര്‍‌ത്തനങ്ങളുടെ ചുവടൊപ്പിച്ച്‌ പ്രവാസ ലോകത്തും പ്രവര്‍‌ത്തനങ്ങള്‍ സജീവമാണ്‌.ക്ഷേമ രാഷ്‌ട്ര സങ്കല്‍‌പത്തിന്റെ വിഭാവനയുമായി ഉണര്‍‌ന്നെണീറ്റ വെല്‍‌ഫയര്‍ പാര്‍‌ട്ടിയുടെ ഖത്തര്‍ മുഖമായ കള്‍‌ച്ചറല്‍ ഫോറം ഏറെ സജീവമായി രം‌ഗത്തുണ്ട്‌.പ്രാദേശിക/മണ്ഡല/ജില്ലാ തല പരിപാടികള്‍ അരങ്ങിലും അണിയറയിലും പ്രവര്‍‌ത്തന സജ്ജമായിക്കൊണ്ടിരിക്കുന്നു.രാജ്യത്തിന്റെ വരും ഭാവി നിര്‍‌ണ്ണയിക്കാനുള്ള ഈ തെരഞ്ഞെടുപ്പ്‌ ഗോദയില്‍ ഓരോ പ്രവര്‍‌ത്തകനും കൈമെയ്‌ മറന്ന്‌ രം‌ഗത്തുണ്ടാവണം.അത്‌ നമ്മുടെ ബാധ്യതയാണ്‌.

ഉദയം പഠനവേദി.
Share:

Monday, March 25, 2019

മൻസൂർ മരണപ്പെട്ടു

പാവറട്ടി: മൻസൂർ (ഫിറു) അയിരൂര്‍ അല്ലാഹുവിലേക്ക് യാത്രയായി.ഉദയം പഠന വേദി പ്രവര്‍‌ത്തക സമിതി അം‌ഗം വി.വി അബ്‌ദുല്‍ ജലീലിന്റെ സഹോദരിയുടെ മകനാണ്‌ മന്‍‌സൂര്‍.ഖബറടക്കം ഇന്ന്‌ നടക്കും.ഉദയം പഠന വേദി ദുഃഖം രേഖപ്പെടുത്തി.
Share:

Wednesday, March 20, 2019

സെറീന മരണപ്പെട്ടു

പാടൂര്‍:മതിലകത്ത് വീട്ടിൽ കൊട്ടുക്കൽ പരേതനായ ഉമ്മർ ഹാജിയുടെ മകൻ അബ്ദുൽ ലത്തീഫിന്റെ ഭാര്യ സെറീന (37) കഴിഞ്ഞ ദിവസം മരണപ്പെട്ടു.പെരിഞ്ഞനം കുഴിക്കണ്ടത്തിൽ ജലീൽ, ഫൗസിയ ദമ്പതികളുടെ മകളാണ് സെറീന.വാടാനപ്പള്ളി സി.എസ്.എം സ്കൂളിലെ പത്താം ക്ലാസ്സ് വിദ്യാർത്ഥിയായ മകന്‍ ഷാറൂഖിനെയും ഇളയ മകന്‍ മൂന്നാം ക്ലാസ്സുകാരനായ ഉമർ ഷഹാനേയും പഠനത്തില്‍ സഹായിച്ച്‌ കൊണ്ടിരിക്കേ പുറം വേദന അനുഭവപ്പെട്ടു.തുടര്‍‌ന്ന്‌ വിശ്രമിക്കാൻ കിടന്നു.ദേഹാസ്വസ്ഥ്യം അധികരിച്ചപ്പോള്‍ അടുത്തുള്ള ആശുപത്രിയിലെത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.മക്കളുടെ പരീക്ഷക്ക് ശേഷം ദുബായില്‍ അവധിക്കാലം ചെലവഴിക്കാനുള്ള ഒരുക്കത്തിലായിരുന്നു സെറീനയും കുടും‌ബവും.പാടൂർ ജുമാ മസ്‌ജിദ്‌ ഖബറിസ്ഥാനിൽ വൻ ജനാവലിയുടെ സാന്നിദ്ധ്യത്തിൽ മറവു ചെയ്തു.
Share:

Friday, December 7, 2018

അവിസ്‌മരണീയം ഈ അന്ത്യയാത്ര.

അവിസ്‌മരണീയം ഈ അന്ത്യയാത്ര.ഷിഹാബ്‌ എം.ഐ..
ചില മരണങ്ങൾ നമുക്ക് വലിയ പാഠങ്ങൾ നൽകുന്നതും പെട്ടെന്ന് മറക്കാൻ കഴിയാത്തതുമായി മനസ്സിൽ തങ്ങി നിൽക്കാറുണ്ട്‌.അത്തരത്തില്‍ ഒരു മരണമാണ് കഴിഞ്ഞ ദിവസം ഉണ്ടായത്. ഓടിക്കൊണ്ടിരിക്കുന്ന വണ്ടിയിൽ തെങ്ങ് വീണ് തലക്ക് ഗുരുതരമായി പരിക്ക് പറ്റി ചികിത്സ തുടരുന്നതിനിടയിൽ മരണപ്പെട്ട അബദുൽ വാജിദെന്ന 20 വയസ്സ് പ്രായമുള്ള പൊന്നു മോൻ ചെറുപ്പം മുതലേ  നേരിട്ട് പരിചയമുള്ള കുട്ടി.. 

രണ്ട് വർഷം മുമ്പ് പ്രവാസലോകത്ത് വെച്ച് പിതാവ് മസ്‌തിഷ്‌കാഘാതത്തെ തുടര്‍‌ന്ന്‌ പരലോകം പൂകിയ വേദനയിലും വേര്‍പാടിലും ദിനങ്ങൾ മുന്നോട്ട് നീക്കിയിരുന്ന പൊന്നുമോൻ.കുടുംബ പരമായി എൻറെ അനുജത്തിയുടെ സഹോദരി പുത്രനാണ്.എപ്പോൾ എവിടെവെച്ച് കണ്ടാലും പുഞ്ചിരിക്കുന്ന മുഖവുമായി വിശേഷങ്ങൾ ആരായുന്ന മോൻ....... 

പല മരണങ്ങളിലും ഞാൻ പങ്കെടുത്തിട്ടുണ്ട്. ജനാസയെ അനുഗമിക്കുകയും നിസ്ക്കാരവും ഖബറടക്കവും കഴിഞ്ഞതിനു ശേഷമേ തിരിച്ച്‌ പോരാറുളളൂ. പണ്ഡിതൻമാരുടെ ജനാസയിലാണ് ജനങ്ങളുടെ ആധിക്യം നേരിട്ട് കണ്ടിട്ടുള്ളത്. ആ ഒരു അവസ്ഥയായിരുന്നു  സാധാരണക്കാരില്‍ സാധാരണക്കാരനായ വാജിദെന്ന പൊന്നുമോൻറെ ജനാസയിൽ കാണാൻ കഴിഞ്ഞത്.വാടാനപ്പളളിയിലും പാടൂരുമായി ഒഴുകിയെത്തിയ ജനസാഗരം മഹാ സമ്മേളനങ്ങളെ വെല്ലുന്നതായിരുന്നു.

അബ്ദുൽ വാജിദിനെ നെഞ്ചിലേറ്റിയ സുഹൃത്തുക്കൾ ജേഷ്ഠന്മാർ  അക്ഷരാർത്ഥത്തിൽ പാടൂർ പള്ളിയും ഖബർസ്ഥാനും വീർപ്പ് മുട്ടിയ നിമിഷങ്ങൾ.രാത്രി 9 മണിക്കാണ് ജനാസ പള്ളിയിൽ എത്തുന്നത്.പരന്നൊഴുകുന്ന ജനസഞ്ചയം, പരിസര പ്രദേശങ്ങളിലെ നാനാഭാഗത്ത് നിന്നും പാഞ്ഞെത്തിയ സഹോദരങ്ങൾ, വേർതിരിവില്ലാതെ തല മുതിർന്നവർ രാഷ്ട്രീയ സാമൂഹ്യ സാംസ്കാരിക വിദ്യാഭ്യാസ മേഖലകളിലെ പ്രമുഖർ ധാരാളം. എല്ലാറ്റിനും സാക്ഷിയെന്നോണം തന്റെ ജ്ഞാന ഗോപുരത്തിൽ വിടർന്ന പുഞ്ചിരിയുമായി വാജിദിൻറെ ജനാസ. സാധാരണഗതിയില്‍ ഒറ്റതവണയെ മയ്യിത്തിന്റെ മുഖം ഞാൻ  നോക്കാറുള്ളൂ.പതിവ് തെറ്റിക്കുക തന്നെ ചെയ്തു.പുഞ്ചിരി തൂകി കിടക്കുന്ന ആ മോൻറെ പൂമുഖത്തേക്ക് പലവട്ടം നോക്കി. ചുറ്റും കൂടി കണ്ണ് നീർ തുടക്കുന്ന, വിങ്ങി വിങ്ങി തേങ്ങുന്ന പലരിൽ ഒരുവനായി ഈയുള്ളവനും.ഖുര്‍ആന്റെ ഹൃദയമായ യാസീൻ ഓതി പ്രാർത്ഥിച്ചു. പിന്നീട് ഫാതിഹ , ഇഖ്‌ലാസ്, മുഅവ്വദത്തൈനി ഓതി തഹ്‌ലീൽ ചൊല്ലി.ഖൽബിൽ തട്ടിയ പ്രാർത്ഥന നടത്തി.

തൃശ്ശൂർ ജൂബിലി മിഷൻ ആശുപത്രിയിൽ നിന്നും രണ്ട് മണിയോടെ മുളം കുന്നത്ത് കാവ് മെഡിക്കൽ കോളജ് മോർച്ചറിയുടെ പോസ്റ്റ്മോർട്ടം കൗണ്ടറിൽ എത്തിച്ചു.പോസ്റ്റ് മോർട്ടത്തിനു ശേഷം വൈകീട്ട് അഞ്ചു മണിയോടെ എസ്‌.വൈ.എസ്‌ സാന്ത്വനം സെൻറെറിൽ മയ്യിത്ത് കുളിപ്പിക്കാൻ എത്തി. അവിടുത്തെ ഉസ്‌താദിൻറെ നേതൃത്വത്തിൽ ഞാനടക്കം മൂന്ന് പേരാണ് മയ്യിത്ത് കുളിപ്പിക്കാൻ ഉണ്ടായിരുന്നത്.കഫൻ ചെയ്‌തതിനു ശേഷം പള്ളിയിൽ നിന്നും മഗ്‌രിബ് ബാങ്കൊലി. ജമാഅത്തിന് ജനങ്ങൾ അണിനിരന്നു.മയ്യിത്ത് പള്ളിയിൽ കയറ്റി.നിസ്‌കാര ശേഷം ജനാസ നിസ്കാരം സാന്ത്വനം സെൻറെറിലെ ഉസ്‌താദ് നേതൃത്വം നൽകി.ദുആക്ക് ശേഷം ജനാസയുമായി വാടാനപ്പളളിയിലെ വീട്ടിലേക്ക് ആംബുലൻസിൽ തഹ്‌ലീല്‍ ചൊല്ലികൊണ്ട് നീങ്ങി. ഏഴര മണിയോടെ മയ്യിത്ത് വീട്ടിൽ എത്തി. ഉറ്റവരെ കാണിക്കാൻ വീടിനകത്ത് വെച്ച് ജനാസ വെച്ചപ്പോഴും സകല നിയന്ത്രണങ്ങളും വിട്ട് ഒരു നോക്ക് കാണാൻ ബന്ധുക്കളും ശേഷം പുറത്ത് വെച്ചപ്പോഴും സുഹൃത്തുക്കൾ അടക്കമുള്ള സഹോദരങ്ങൾ എല്ലാവരുടേയും അവസാന നോക്കിനു ശേഷം വീട്ടിലെ നിസ്ക്കാരം.ശേഷം പാടൂരിലെ ഉമ്മയുടെ വീട്ടിലും പൊതുദർശനം.

എത്രമേൽ ജന ഹൃദയങ്ങളിൽ പ്രിയങ്കരനായിരുന്നു വാജിദ്  എന്നതിന്റെ തെളിവാണ്  വാടാനപ്പളളിയിലെ വീട്ടിലും പാടൂർ ജുമുഅത്ത് പള്ളിയിലും കണ്ടത്.......  ജനപ്രവാഹം രാത്രി ജനാസ മറവ് ചെയ്യുമ്പോഴും അതിന് ശേഷവും തുടരുകയായിരുന്നു.

നാഥനായ റബ്ബിൻറെ തീരുമാനം അത് യഥാസമയം നടന്നു കഴിഞ്ഞു റബ്ബ് നാമെല്ലാവരേയും അപകട മരണങ്ങളിൽ നിന്നും രക്ഷപ്പെടുത്തി തരുമാറാകട്ടെ.വിടപറഞ്ഞ വാജിദിൻറെ ബർസഖിയായ ജീവിതം പ്രഭാ പുരിതമാക്കട്ടെ.പാപങ്ങൾ പൊറുത്ത് കൊടുക്കട്ടെ. സ്വർഗ്ഗം നൽകി അനുഗ്രഹിക്കട്ടെ.മകൻറെ വേർപാടിൽ വിഷമിക്കുന്ന മാതാവിനും സഹോദരനും കുടുംബങ്ങൾക്കും അല്ലാഹു  ക്ഷമയും സമാധാനവും  നൽകി അനുഗ്രഹിക്കട്ടെ..

ഷിഹാബ്‌ എം.ഐ
Share:

Monday, December 3, 2018

വാജിദ്‌ കബീര്‍ യാത്രയായി

മുല്ലശ്ശേരി:ഉദയം പഠനവേദിയുടെ മുന്‍‌കാല പ്രവര്‍‌ത്തകന്‍ പരേതനായ അബ്‌ദുല്‍ കബീറിന്റെ മൂത്ത പുത്രന്‍ വാജിദ്‌ കബീര്‍ അല്ലാഹുവിലേയ്‌ക്ക്‌ യാത്രയായി.കഴിഞ്ഞ വാരത്തില്‍ നടന്ന ബൈക്ക്‌ അപകടത്തില്‍ പെട്ട്‌ തൃശൂരില്‍ ചികിത്സയിലായിരുന്നു.2016ല്‍ അബ്‌ദുല്‍ കബീര്‍ മസ്‌തിഷ്‌കാഘാതത്തെ തുടര്‍‌ന്ന്‌ സ‌ഊദി അറേബ്യയില്‍ വെച്ച്‌ നിര്യാതനായി.2017ല്‍ അബ്‌ദുല്‍ കബീറിന്റെ അനുജന്‍ എമിറേറ്റ്‌സില്‍ വെച്ചും മരണമടഞ്ഞിരുന്നു.

കണ്ണോത്ത് മഹല്ല്‌ ഖബര്‍‌സ്ഥാനിലായിരുന്നു അബ്‌ദുല്‍ കബീറിനെ ഖബറടക്കിയത്. അബ്‌ദുല്‍ വാജിദ്‌ അബ്‌ദുല്‍ കബീറിന്റെ മയ്യിത്ത് വാടാനപ്പള്ളിയിലെ വസതിയില്‍ എത്തിച്ച ശേഷം പാടൂര്‍ മഹല്ല്‌ ഖബര്‍‌സ്ഥാനില്‍ വൈകുന്നേരം ഖബറടക്കുമെന്ന്‌ ബന്ധുക്കള്‍ അറിയിച്ചു.

ഉദയം പഠനവേദി,നന്മ തിരുനെല്ലുര്‍ തുടങ്ങിയ പ്രദേശത്തേയും പ്രവാസലോകത്തേയും സം‌ഘടനകള്‍ അനുശോചനം രേഖപ്പെടുത്തി.
Share:

Sunday, October 28, 2018

നന്ദികെട്ടവനാണ്‌ മനുഷ്യന്‍

പാവറട്ടി: പ്രകൃതിക്ക് മേൽ സ്വാര്‍‌ഥനായ മനുഷ്യന്റെ അനാവശ്യ കൈ കടത്തലുകളാണ് ദുരന്തങ്ങൾക്ക് കാരണമാകുന്നതെന്ന്‌ ചിന്തകനും  സഹൃദയ ലോകത്തിന്റെ ഹൃദയം  കീഴടക്കിയ  എഴുത്തുകാരനുമായ ശ്രീ.പി.സുരേന്ദ്രൻ പറഞ്ഞു.
സോളിഡാരിറ്റി യൂത്ത് മൂവ്മെന്റ് ചാവക്കാട് ഏരിയ പാവറട്ടി കോപ്പറേറ്റീവ് ബാങ്ക് ഓഡിറ്റോറിയത്തിൽ സംഘടിപ്പിച്ച   സ്നേഹ  സംഗമം ഉദ്ഘാടനം ചെയ്‌ത്‌ സംസാരിക്കുകയായിരുന്നു അദ്ദേഹം.

വിവിധ ആരാധനാലയങ്ങളിലും അനുബന്ധ സ്ഥാപനങ്ങളിലും ആര്‍‌ക്കും കടന്നു വരാമെന്നും വേണ്ടിവന്നാല്‍ ദിവസങ്ങളോളം താമസിക്കാമെന്നും നാം ലോകത്തിനു കാട്ടിക്കൊടുത്തു.പ്രത്യേകിച്ച്‌ ഇവിടെ ഒന്നും സം‌ഭവിക്കാന്‍ പോകുന്നില്ല.എന്നാല്‍ ദുരന്തം വിട്ടൊഴിഞ്ഞപ്പോള്‍ നാം പറയുന്നത് തികച്ചും വികൃതമായ ന്യായങ്ങളാണെന്നും ഒരു ദുരന്തം തന്നെ തീര്‍‌ക്കാനുള്ള തയ്യാറെടുപ്പിലാണ്‌ നന്ദികെട്ട മനുഷ്യനെന്നും സുരേന്ദ്രന്‍ പരിതപിച്ചു.

ജമാ‌അത്തെ ഇസ്‌ലാമി ഏരിയ പ്രസിഡന്റ്‌ എ.വാഹിദ്‌,സോളിഡാരിറ്റി ജില്ല സെക്രട്ടറി കെ.എം സാബു,അബ്‌ദുല്‍ സലാം കൈതമുക്ക്‌,ലത്വീഫ്‌ കൈതമുക്ക്‌,അഹമ്മദ്‌ കവല,പരിസ്ഥിതി പ്രവര്‍‌ത്തകന്‍ ഉസ്‌മാന്‍ കൂരിക്കാട്‌ എന്നിവര്‍ പ്രളയകാലാനുഭവങ്ങളും വര്‍‌ത്തമാന കാല രാഷ്‌ട്രിയ വൃത്താന്തങ്ങളും പങ്കുവെച്ചു.

സമദ് കുന്നക്കാവ് മുഖ്യ പ്രഭാഷണം നടത്തി. സോളിഡാരിറ്റി ചാവക്കാട് ഏരിയ പ്രസിഡന്റ്‌ സുഹൈൽ  അധ്യക്ഷത വഹിച്ചു. അസീസ് മഞ്ഞിയിൽ സ്വാഗതവും എ.വി ഹംസ മാസ്റ്റർ നന്ദിയും പറഞ്ഞു
Share:

Sunday, September 23, 2018

ഹയര്‍ സെക്കന്ററി കോണ്‍‌ഫറന്‍‌സ്‌

തൃശൂര്‍:ജീവിതത്തിന്റെ എല്ലാ മേഖലകളിലും വിശിഷ്യാ വിദ്യാഭ്യാസ രംഗത്ത് വിപ്‌ളവകരമായ ഔന്നത്യത്തിന്‌ ജി.ഐ.ഒ എന്ന സുഭദ്രവും സുശക്തവുമായ കണ്ണിയില്‍ അണിചേര്‍ന്ന്‌ പ്രവര്‍‌ത്തന നിരതമാകേണ്ടത് കാലഘട്ടത്തിന്റെ തേട്ടമത്രെ.തൃശുര്‍ ജില്ലാ ജമാ‌അത്തെ ഇസ്‌ലാമി പ്രസിഡന്റ്‌ എം.എ ആദം സാഹിബ്‌ പറഞ്ഞു.സമൂഹത്തിലെ സാം‌സ്‌കാരികമായ മുന്നേറ്റത്തില്‍ സ്‌ത്രീയുടെ പ്രാധിനിത്യം അനിഷേധ്യമത്രെ.പ്രസ്‌തുത പ്രാധിനിത്യത്തെ യഥാ സമയങ്ങളില്‍ പരിപോഷിപ്പിച്ച്‌ കൊണ്ടിരിക്കുന്ന ഉത്തരവാദിത്വമുള്ള സം‌ഘവും സംഘടനയുമാണ്‌ ഗേള്‍‌സ്‌ ഇസ്‌ലാമിക് ഓര്‍‌ഗനൈസേഷന്‍ എം.എ ആദം സാഹിബ്‌ ഓര്‍‌മ്മിപ്പിച്ചു.ജി.ഐ.ഒ തൃശൂര്‍ ജില്ല ഘടകം സം‌ഘടിപ്പിച്ച ഹയര്‍ സെക്കന്ററി കോണ്‍‌ഫറന്‍‌സ്‌ ഉദ്‌ഘാടനം ചെയ്യുകയായിരുന്നു അദ്ദേഹം.

ഇന്ത്യന്‍ മുസ്‌ലിം‌കളും ചരിത്രവും രാഷ്‌ട്രീയവും,ക്യാമ്പസ്‌ രാഷ്‌ട്രീയ ഇടപെടല്‍,നവ സ്‌ത്രീ വാദങ്ങള്‍ ആയിഷയിലേയ്‌ക്കുള്ള ദൂരം തുടങ്ങിയ വിഷയങ്ങളില്‍ യഥാ ക്രമം നവാസ്‌ കെ.എസ്‌,ഷഫ്‌റിന്‍ കെ.എം,നൗഷബ നാസ്‌ തുടങ്ങിയവര്‍ വിഷയാവതരണം നടത്തി.

ജി.ഐ.ഒ ഏരിയ പ്രസിഡന്റ്‌ ഇര്‍‌ഫാന കെ.ഐ യുടെ ഖുര്‍‌ആന്‍ പഠനത്തോടെ ആരം‌ഭിച്ച കോണ്‍‌ഫറന്‍‌സില്‍ ജി.ഐ.ഒ തൃശൂര്‍ ജില്ല പ്രസിഡന്റ്‌  ഫാത്വിമ ജുമാന അധ്യക്ഷത വഹിച്ചു.പ്രോഗ്രാം കണ്‍‌വീനര്‍ ജിന്‍സിയ പി.എ സ്വാഗതം ആശം‌സിച്ചു.

ഹിബ മഞ്ഞിയില്‍,മഹ്‌ഫൂസ മന്‍സൂര്‍ തുടങ്ങിയവര്‍ നേതൃത്വം നല്‍കിയ പരിപാടി റഹ്‌മത്തുന്നിസ വി.എയുടെ സന്ദേശത്തോടെ സമാപനം കുറിച്ചു.

Share:

Sunday, August 5, 2018

കേലാണ്ടത്ത് ഫാത്വിമ മരണപ്പെട്ടു

വെന്മേനാട്‌:സലാഹുദ്ധീന്‍ മുസ്ല്യാരുടെ ഭാര്യ കേലാണ്ടത്ത് ഫാത്വിമ പാടൂര്‍  അല്ലാഹുവിലേയ്‌ക്ക്‌ യാത്രയായിരിക്കുന്നു.ഫാത്വിമയുടെ നാത്തൂന്‍ ചാങ്കര സൈനബ അഹമ്മദ്‌ ഗള്‍‌ഫിലേയ്‌ക്ക്‌ യാത്രക്കൊരുങ്ങിയിരിക്കെ കഴിഞ്ഞ ദിവസമാണ്‌ മരണപ്പെട്ടത്.പ്രമേഹ രോഗത്താല്‍ ഏറെ പ്രയാസമുണ്ടായിരുന്നതായി അറിയുന്നു.ശാരീരിക അസ്വസ്ഥതകളെ തുടര്‍‌ന്ന്‌ ആശുപത്രിയില്‍ കാണിച്ചിരുന്നു.രാത്രി വീണ്ടും പ്രയാസം അനുഭവപ്പെട്ടപ്പോള്‍ തൃശൂര്‍ അമല ആശുപത്രിയിലേയ്‌ക്ക്‌ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

പരേതനായ തൊയക്കാവ്‌ സെ്‌യ്‌തു മുഹമ്മദ്‌,പരേതനായ പാടൂര്‍ അഹമ്മദ്‌ മുസ്‌ല്യാര്‍, കേലാണ്ടത്ത് അബ്‌ദുറഹിമാന്‍ എന്നിവരുടെ സഹോദരിയാണ്‌ ഫാത്വിമ.അസീസ്‌ മഞ്ഞിയിലിന്റെ മൂത്തുമ്മയുടെ മകള്‍.

ഖബറടക്കം ഇന്ന്‌ തിങ്കളാഴ്‌ച 06.08.2018 ന്‌ വൈകീട്ട്‌ വെന്മേനാട്‌ പള്ളി ഖബര്‍‌സ്ഥാനില്‍ നടക്കുമെന്ന്‌ ബന്ധുക്കള്‍ അറിയിച്ചു.
Share:

Thursday, August 2, 2018

സൈനബ മരണപ്പെട്ടു

പാടൂർ:കേലാണ്ടത്ത് പരേതനായ അഹമ്മദ് മുസ്ല്യാരുടെ ഭാര്യ തിരുനെല്ലൂർ ചാങ്കര റുഖിയ്യയുടെ മകള്‍ സൈനബ ഇന്ന്‌ പുലര്‍‌ച്ചയ്‌ക്ക്‌ മരണപ്പെട്ടു.മകന്‍ ഷാഹുല്‍ യു.എ.ഇ യില്‍ നിന്നും ഇന്ന്‌ വൈകുന്നേരത്തോടെ നാട്ടിലെത്തും രാത്രി 8 മണിയോടു കൂടെ പാടൂർ പള്ളി ഖബർസ്ഥാനിൽ ഖബറടക്കം നടക്കും.

സൈനബ ഇന്ന്‌ അബുദാബിയിലേയ്‌ക്കുള്ള യാത്രാ ഒരുക്കത്തിലായിരുന്നു. അബ്‌ദു റഹിമാന്‍ കേലാണ്ടത്തിന്റെ സഹോദരന്റെ ഭാര്യയും അസീസ്‌ മഞ്ഞിയിലിന്റെ മൂത്തുമ്മയുടെ മകന്റെ ഭാര്യയുമാണ്‌ നിര്യാതയായ സൈനബ.
ഉദയം പഠനവേദി സഹോദരിയുടെ നിര്യണത്തില്‍ ദുഃഖം രേഖപ്പെടുത്തി.
Share:

Tuesday, July 31, 2018

ചൊവല്ലൂര്‍പടി ജലാല്‍ മരണപ്പെട്ടു

ദോഹ: ഖത്തറിൽ ദീർഘകാല പ്രവാസിയും ഗുരുവായൂർ, ചൊവ്വല്ലൂർപടി സ്വദേശിയുമായ ജലാല്‍ ഹൃദയ സ്തംഭനം മൂലം തിങ്കളാഴ്ച (ജൂലായ്‌ 30) രാത്രി 9 മണിയോടെ മരണമടഞ്ഞു.ജോലി സ്ഥലത്ത് കുഴഞ്ഞ്‌ വീണതിനെ തുടര്‍‌ന്ന്‌ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

കുടുംബം ഖത്തറിലുണ്ട്‌.പരേതന്റെ മൂത്ത മകൾ ലുലു ജലാല്‍ ഖത്തർ ഫൗണ്ടേഷന്റെ  കീഴിലുള്ള കോളേജിലും രണ്ടാമത്തെ മകൻ തമീം ജലാല്‍ എം.ഇ.എസ് സ്ക്കൂളിൽ പ്ലസ്‌ടു വിലും പഠിക്കുന്നു.അൽഖോർ ആശുപത്രി മോർച്ചറിയിൽ സൂക്ഷിച്ചിട്ടുള്ള മൃത ദേഹം നടപടി ക്രമങ്ങൾക്ക് ശേഷം നാട്ടിൽ കൊണ്ടു പോയി മറവ് ചെയ്യുമെന്ന്‌ ബന്ധുക്കള്‍ അറിയിച്ചു.

ഭാര്യ:-നൂര്‍ജഹാന്‍,മക്കള്‍:-ലുലു ജലാല്‍,തമീം ജലാല്‍. പിതാവ്‌:-പരേതനായ കുഞ്ഞു മുഹമ്മദ്‌ ചൊവല്ലൂര്‍പടി,മതാവ്‌:- പരേതനായ വെന്മേനാട്‌ പി.സി മുഹമ്മദിന്റെ പരേതയായ മൂത്ത സഹോദരി സൈനബ. സഹോദരങ്ങള്‍:-റസിയ,റഫീഖ്‌,സലീം,റഹ്‌മാന്‍,ഷാജി,ജുനൈദ്,ഷൗകത്ത്,മുന്തസ്.

ജലാല്‍ ചൊവ്വല്ലൂര്‍പടിയുടെ ആകസ്‌മിക നിര്യാണത്തില്‍ ഉദയം പഠന വേദി ദുഃഖം രേഖപ്പെടുത്തി.

മരണാനന്തര ഔദ്യോഗിക നടപടി ക്രമങ്ങളില്‍ സഹായിക്കാനും സഹകരിക്കാനും വി.എം റഫീഖും (ഉദയം) സി.എഫ് ജന സേവന വിഭാഗവും രം‌ഗത്തുണ്ട്‌.

അല്‍‌ഖോര്‍ ആശുപത്രി പരിസരത്ത് ഇന്ന്‌ ജൂലായ്‌ 31 ചൊവ്വാഴ്‌ച വൈകീട്ട്‌ 8 മണിക്ക്‌ പരേതനു വേണ്ടിയുള്ള നമസ്കാരം നടക്കുമെന്ന്‌ അടുത്ത ബന്ധുക്കള്‍ പറഞ്ഞു.മൃതദേഹം നാളെ ആഗസ്റ്റ് ഒന്നിന്‌ ബുധനാഴ്‌ച നാട്ടില്‍ ഖബറടക്കാന്‍ കഴിയും വിധം കൊണ്ടു പോകാന്‍ കഴിയുമെന്ന്‌ പരേതന്റെ ബന്ധുവായ വി.എം റഫീഖ്‌ അറിയിച്ചു.
Share:

Manjiyil

Manjiyil
Manjiyil

Popular Posts

Blog Archive

Join Broadcast List

Name

Email *

Message *

Copyright © Udhayam | Powered by Blogger Design by PWT | Blogger Theme by NewBloggerThemes.com