International Udhayam

നിങ്ങള്‍ ഉത്കൃഷ്ട സമൂഹമാണ്, നന്മ കല്‍പ്പിക്കുകയും തിന്മ വിരോധിക്കുകയും ചെയ്യുന്ന സമൂഹം."...

Saturday, January 13, 2018

പുളിക്കല്‍ നഫീസ മരണപ്പെട്ടു

പാവറട്ടി : വെന്മേനാട്‌ പരേതനായ പുളിക്കല്‍ സെയ്‌ത്‌ മുഹമ്മദിന്റെ ഭാര്യ നഫീസ മരണപ്പെട്ടു.ഉദയം പ്രവര്‍‌ത്തക സമിതി അം‌ഗം ഷാജഹാന്‍ എ.വിയുടെ മാതാവാണ്‌ പരേതയായ നഫീസ.രോഗം മൂര്‍‌ഛിച്ചതറിഞ്ഞ്‌ വ്യാഴാഴ്‌ച ഷാജഹാന്‍ നാട്ടിലേയ്‌ക്ക്‌ പുറപ്പെട്ടിരുന്നു.ജനുവരി 11 വ്യാഴാഴ്‌ച വൈകുന്നേരമായിരുന്നു അന്ത്യം.വെള്ളിയാഴ്‌ച ജുമുഅ നമസ്‌കാരത്തിനു മുമ്പ്‌ ഖബറടക്കം നടന്നു.ഉദയം പഠനവേദി അനുശോചനം രേഖപ്പെടുത്തി.
Share:

Wednesday, January 3, 2018

കോടെ പറമ്പില്‍ ബഷീര്‍ വിടപറഞ്ഞു.

ദോഹ:പാവറട്ടി പണിക്കവീട്ടിൽ കോടെ പറമ്പില്‍ ബഷീര്‍ അഹ്‌മദ്‌ സാഹിബ്‌ (65.വയസ്സ്) വിടപറഞ്ഞു.ഹൃദയാഘാതത്തെ തുടര്‍‌ന്ന്‌ ദോഹ ഹമദ്‌ ആശുപത്രിയില്‍ തീവ്ര പരിചരണ വിഭാഗത്തിലായിരുന്നു.

ഇസ്‌ലാമിക് അസോസിയേഷന്‍ ഖത്തര്‍ ഘടകത്തിന്റെ എസ്‌ദാന്‍ വനിതാ യൂണിറ്റ്‌ പ്രവര്‍‌ത്തക നസീമ ടീച്ചറുടെ ഭര്‍ത്തവാണ്‌ പരേതനായ ബഷീര്‍.ഉദയം വൈസ്‌ പ്രസിഡണ്ട്‌ എം.എം അബ്‌ദുല്‍ ജലീലിന്റെ ഭാര്യ സൈനബയുടെ പിതൃ സഹോദരന്റെ മകനാണ്‌.ഖബറടക്കം  ഇന്ന്‌ ജനുവരി 3 ന്‌ രാത്രി 11 മണിക്ക്‌ ഖത്തറില്‍ അബൂഹമൂർ ഖബർസ്ഥാനിൽ നടക്കുമെന്ന്‌ ബന്ധുക്കള്‍ അറിയിച്ചു.

കഴിഞ്ഞ 20 വർഷമായി ഖത്തർ എയർവെയ്‌സിൽ ഉദ്യോഗസ്ഥനായിരുന്ന ബഷീര്‍ സാഹിബ്‌ ജോലിയിൽ നിന്ന്‌ വിരമിച്ച് നാട്ടിൽ പോകാന്‍ തയ്യാറെടുക്കവേയാണ് രോഗബാധിതനായി ദിവസങ്ങള്‍‌ക്ക്‌ മുമ്പ്‌  ആശുപത്രിയില്‍ പ്രവേശിപ്പിക്കപ്പെട്ടത്.ഭാര്യ നസീമ, മക്കൾ നാഷിദ്, ഹാഫിസ്, ഡോക്ടർ ഷാനി, മരുമക്കൾ: മിൻസി റൂബി നാഷിദ്, ഡോക്ടർ ഫഹദ്.

ഉദയം പഠനവേദിയുടെ ആദ്യകാല സഹകാരികളൊരാളായിരുന്ന ബഷീര്‍ സാഹിന്റെ നിര്യാണത്തില്‍ ഉദയം പഠനവേദിയും അനുബന്ധ ഘടകങ്ങളും അനുശോചനം രേഖപ്പെടുത്തി.
Share:

Sunday, December 31, 2017

ജി.ഐ.ഒ ഏരിയ സമ്മേളനം

പാവറട്ടി:ഇഹപര ജിവിതത്തെ കുറിച്ച്‌ കൃത്യമായ ബോധവും ബോധ്യവുമുള്ളവരാണ്‌ വിശ്വാസികളും വിശ്വാസിനികളും.അതിനാല്‍ തന്നെ അവരുടെ ഉത്തരവാദിത്ത ബോധവും വര്‍‌ദ്ധിയ്‌ക്കും.അല്ലെങ്കില്‍ വര്‍‌ദ്ധിച്ചിരിക്കണം.പൊതു സമൂഹത്തിന്‌ വിളക്കും വെളിച്ചവും കാണിക്കാന്‍ നിയോഗിക്കപ്പെട്ടവരത്രെ അവര്‍.റഷീദ്‌ പാടൂര്‍ പറഞ്ഞു.ഗുരുവായൂര്‍ ഏരിയ ഗേള്‍‌സ്‌ ഇസ്‌ലാമിക് ഓര്‍ഗനൈസേഷന്‍ ഏരിയ സമ്മേളനം ഉദ്‌ഘാടനം ചെയ്യുകയായിരുന്നു റഷീദ്‌ പാടൂര്‍.

രണ്ട്‌ സെഷനുകളിലായി നടന്ന സം‌ഗമത്തില്‍ ആദ്യ സെഷനില്‍ ജി.ഐ.ഒ ഗുരുവായൂര്‍ പ്രസിഡണ്ട്‌ അഹ്‌ലു അബ്‌ദുല്‍ ലത്വീഫും രണ്ടാമത്തെ സെഷനില്‍ ഏരിയ ജമാ‌അത്ത് പ്രസിഡണ്ട്‌ അബ്‌ദുല്‍ വാഹിദ്‌ സാഹിബും അധ്യക്ഷത വഹിച്ചു.ഐഷ മജീദിന്റെ ഖിറാ‌അത്തോടെ തുടക്കം കുറിച്ച സം‌ഗമത്തില്‍ ജി.ഐ.ഒ ഗുരുവായൂര്‍ ഏരിയ സെക്രട്ടറി ഹിബ മഞ്ഞിയില്‍ സ്വാഗത ഭാഷണം നടത്തി.

ഡോ.അബ്‌ദുല്‍ ലത്വീഫിന്റെ പഠനാര്‍‌ഹമായ ക്ലാസ്സ്‌ സമ്മേളനത്തിന്‌ ആത്മീയമായ ഉണര്‍വ്വും ഉന്മേഷവും പകര്‍‌ന്നു.ജില്ലാ ഉപജില്ലാ വിഭാഗങ്ങളില്‍ നടത്തപ്പെട്ട കലോത്സവങ്ങളില്‍ മികവ്‌ പുലര്‍‌ത്തിയ കുട്ടികളെ പ്രത്യേകം ആദരിച്ചു.

ജമാ‌അത്ത് പുരുഷ വനിതാ നേതാക്കളായ അബ്‌ദുല്‍ വാഹിദ്‌ സാഹിബ്‌,എ.വി ഹം‌സ സാഹിബ്‌,അബ്‌ദുല്‍ ജലീല്‍ സാഹിബ്‌,ഷമീല ഹുസൈന്‍.റഷീദ സലീം,സഫ്‌വാനാ സൈഫുദ്ധീന്‍,സോളിഡാരിറ്റി ഏരിയ പ്രസിഡണ്ട്‌ സുഹൈല്‍ ഒരുമനയൂര്‍,എസ്‌.ഐ.ഒ ഗുരുവായൂര്‍ ഏരിയ വൈസ്‌ പ്രസിഡണ്ട്‌ ഹമദ്‌ മഞ്ഞിയില്‍ തുടങ്ങിയവര്‍ വിവിധ സെഷനുകളിലെ ക്രിയാത്മകമായ ചര്‍‌ച്ചകളേയും പരിപാടികളേയും സജീവമാക്കി.ഹിഷാര സുല്‍ത്താനാ നന്ദി പ്രകാശിപ്പിച്ചു.
Share:

Saturday, December 30, 2017

വിശ്വാസം :- പ്രതിരോധവും പ്രതീക്ഷയും


പാവറട്ടി:ഗേള്‍‌സ്‌ ഇസ്‌ലാമിക് ഓര്‍‌ഗനൈസേഷന്‍ ഗുരുവായൂര്‍ ഏരിയ സമ്മേളനം.പാവറട്ടി ഖുബ ഹാളില്‍, ഡിസം‌ബര്‍ 31 ഞായറാഴ്‌ച, രാവിലെ 9.30 ന്‌.സം‌ഘടിപ്പിക്കുമെന്ന്‌ ഗുരുവായൂര്‍ ഏരിയ സെക്രട്ടറി ഹിബ മഞ്ഞിയില്‍ പറഞ്ഞു.

പവിത്രമായ വിശ്വാസം പ്രസരിപ്പിക്കുന്നതു പോലും അവിശ്വസനീയമാം വിധം അനഭിലഷണീയവും അശ്‌ളീലവുമായി ചിത്രീകരിക്കപ്പെടുന്ന വര്‍‌ത്തമാന കാല കുത്തൊഴുക്കില്‍,അത്യത്ഭ്തകരമായി ഒഴുക്കിനെതിരെ നീന്തിക്കയറാന്‍ ഊര്‍‌ജ്ജവും ആവേശവുമാകുന്നതും വിശ്വാസ ദാര്‍‌ഢ്യമാണന്നതത്രെ പരമാര്‍‌ഥം.ഇവിടെ വിശ്വാസം പ്രതിരോധവും പ്രതീക്ഷയുമായി മാറുകയാണ്‌.

വിശ്വാസം പ്രതിരോധവും പ്രതീക്ഷയും എന്ന തലക്കെട്ടില്‍ ജി.ഐ.ഒ സം‌ഘടിപ്പിക്കുന്ന സമ്മേളനത്തില്‍ മുസ്‌ലിം പെണ്‍‌കുട്ടികളുടെ ബാധ്യത,ആത്മീയത എന്നീ വിഷയങ്ങളെ അധികരിച്ച് യഥാ ക്രമം റഷീദ്‌ പാടൂര്‍,ഡോക്‌ടര്‍ അബ്‌ദുല്‍ ലത്വീഫ്‌ തുടങ്ങിയവര്‍ പ്രഭാഷണം നടത്തും.

ജമാ‌അത്തെ ഇസ്‌ലാമി ഗുരുവായൂര്‍ ഏരിയ നേതാക്കളും,പോഷക ഘടക നേതൃത്വങ്ങളും  സദസ്സിനെ സമ്പന്നമാക്കും.
Share:

Friday, December 22, 2017

പ്രതിഷേധ റാലിക്ക് ആശംസകള്‍

ജറുസലേമിനെ  അശുദ്ധമാക്കാൻ  അനുവദിക്കാതിരിക്കാം ..
ഗൾഫ് പ്രതിസന്ധിയുടെയും  അറബ് ലോകത്തിൻറെ  നിസ്സംഗതയുടെയും  അവസ്ഥയെ  മറയാക്കി  മുസ്ലിംകളുടെ  മൂന്നാമത്തെ  പുണ്യകേന്ദ്രമായ  ഖുദ്‌സിലേക്ക്  കടന്നു കയറുകയും  അതിക്രമം  പ്രവർത്തിക്കുകയും  ചെയ്തു  കൊണ്ടിരിക്കുന്ന  ജൂദ  തീവ്രവാദികൾക്ക്  വെള്ളവും  വളവും  നൽകി , രാഷ്ട്രീയമായും  സാമ്പത്തികമായും  പിന്തുണ  നൽകി കൊണ്ടിരിക്കുന്ന  തീവ്ര വംശീയവാദിയായ  ട്രംപിന്റെ  കൊള്ളരുതായ്മകൾക്ക്  നേരെ പ്രതിഷേധം പ്രകടിപ്പിക്കൽ  വിശ്വാസികളുടെ കടമയാണ്.

ബൈത്തുൽ   മുഖദസ്  പ്രശ്നം  കേവലം  ഒരു  പലസ്‌തീൻ  പ്രശ്നം  മാത്രമാക്കി ചുരുക്കി കെട്ടാനാണ്  ശതുക്കൾ  ശ്രമിച്ചുകൊണ്ടിരിക്കുന്നത്. വിശുദ്ധ  ഖുദ്‌സ്  ലോകത്താകമാനമുള്ള  മുസ്ലിംകളുടെ പൊതു  സ്വത്താണ്.  അതിൻറെ വീണ്ടെടുപ്പിന്  വേണ്ടിയാണ്  ഫലസ്തീനിലുള്ള  ആബാലവൃദ്ധം  ജനങ്ങൾ  രാപ്പകലില്ലാതെ , സർവ്വായുധ സജ്ജരായ  ഇസ്രായേൽ  സൈന്യത്തോട്  വെറും കൽച്ചീളുകളുമായി  പടപൊരുതിക്കൊണ്ടിരിക്കുന്നത്. 15  അംഗങ്ങളിൽ  14 പേരും  ട്രംപിന്റെ  തീരുമാനത്തിനെതിരെ  വോട്ട്  ചെയ്തപ്പോൾ  അമേരിക്ക  മാത്രമാണ്  തങ്ങളുടെ  കയ്യിലുള്ള  ഇരുമ്പുലക്കയായ  വീറ്റോ  അധികാരം ഉപയോഗിച്ച്  ലോക ജനതയെ  വിഡ്ഢികളാക്കിയത്.. 1948 ൽ  മുസ്ലിം ലോകത്തിൻറെ  നെഞ്ചത്ത്  അന്യായമായി  പ്രതിഷ്ഠിച്ച  ഇസ്രായേലെന്ന  ജാരസന്തതിയെപ്രതി സംഘർഷഭരിതമായ  മുസ്ലിം ലോകത്ത്  ഒരിക്കലും അവസാനിക്കാത്ത  സംഘർങ്ങളും  അസമാധാനവും അരക്ഷിതാവസ്ഥയും  നിലനിറുത്തുക  എന്ന  കുടില തന്ത്രം  മാത്രമാണ്  ട്രംപ്  ഈ  തീരുമാനത്തിലൂടെ  ആഗ്രഹിക്കുന്നത്. അത് വഴി  അറബികളുടെ  സമ്പത്ത്  ഊറ്റിയെടുക്കുകയും  തങ്ങളുടെ  ആയുധ  കച്ചവടം  കോട്ടമില്ലാതെ  നിലനിര്ത്തുകയും  ചെയ്യുക  എന്ന  ഇരട്ടി നേട്ടം. പോപ്പിൻറെയും  മറ്റ്  ക്രിസ്ത്യൻ  വിഭാഗങ്ങളുടെയും  പ്രതിഷേധങ്ങൾ  ഇന്നോ നാളെയോ  അവസാനിച്ചേക്കാം. തീർത്ഥാടനോദ്ദേശത്തോടെ  റസൂൽ (സ) അനുവാദം  നൽകിയ  ആദ്യത്തെ  ഖിബ്‌ലയും  മൂന്നാമത്തെ  മസ്ജിദുമായ, റസൂൽ (സ)  ആകാശാരോഹണത്തിന്  ആരംഭം  കുറിച്ച ,ഒട്ടനവധി  പ്രവാചകൻമാരുടെ  പാദസ്പർശമേറ്റ്  അനുഗ്രഹീതമായ  മസ്ജിദുൽ  അഖ്‌സ  മുസ്ലിം ലോകത്തിന്  എന്നെന്നേക്കുമായി  നഷ്ടപ്പെടുക , അത്  മുസ്ലികളുടെ  ശത്രുക്കളുടെ  അന്യായമായ കൈകടത്തലുകൾ  കൊണ്ട്  മലീമസമാകുന്നത്  എന്നെന്നും  നാം  കണ്ടുകൊണ്ടിരിക്കുക  എന്ന  ദുർഗതിയാണ്  നമ്മെ  കാത്തിരിക്കുന്നത്. മതധാര്‍മിക മൂല്യങ്ങള്‍ക്കും  നിയമത്തിനും മനുഷ്യത്വത്തിനും  നിരക്കാത്ത  നടപടികളിലൂടെ  മസ്ജിദുല്‍ അഖ്‌സയെ ജൂതവല്‍കരിക്കാന്‍  അധിനിവേശകര്‍ നടത്തുന്ന  പാഴ്ശ്രമങ്ങള്‍  ഈ സമുദായത്തിന്റെ  നാഡിമിടിപ്പ്  നിലനില്‍ക്കുന്ന  കാലത്തോളം ദൈവാനുഗ്രഹത്താല്‍  പരാജയപ്പെടും. ഖുദ്‌സ് നഗരത്തെ  മറ്റ്  ഫലസ്തീന്‍ പ്രദേശങ്ങളില്‍  നിന്ന്  ഒറ്റപ്പെടുത്താനുള്ള  അവരുടെ  നടപടികള്‍ വിജയിക്കുകയില്ല.

ഖുര്‍ആന്‍ പറയുന്നു: ''ഇക്കൂട്ടര്‍  ഒരിക്കലും  തുറന്ന മൈതാനത്തുവെച്ച്  ഒറ്റക്കെട്ടായി  നിങ്ങളെ  നേരിടുകയില്ല. യുദ്ധം ചെയ്യുകയാണെങ്കില്‍ത്തന്നെ  അത്  സുശക്തമായ  കോട്ടകളാല്‍ സുഭദ്രമായ പട്ടണങ്ങളില്‍ നിലുയറപ്പിച്ചുകൊണ്ടോ  ഭിത്തികള്‍ക്ക്  പിറകില്‍ ഒളിച്ചുനിന്നുകൊണ്ടോ  ആയിരിക്കും.  ഇവര്‍ തങ്ങള്‍ക്കകത്ത്  തമ്മില്‍ത്തമ്മില്‍ എതിര്‍ക്കുന്നതില്‍  ബഹുശൂരന്മാരാകുന്നു.  നീ  ഇവരെ ഒറ്റക്കെട്ടെന്ന് കരുതുന്നു. എന്നാല്‍,  ഇവരുടെ ഹൃദയങ്ങള്‍  ചിതറിക്കിടക്കുകയാണ്.'' (അല്‍ഹശ്ര്‍: 14)

ഇത്തരുണത്തിൽ , സന്ദർഭത്തിനൊത്തുണർന്ന് , ബൈത്തുൽ  മുഖദ്ദിസിനോടുള്ള  ഐക്യദാർഢ്യം  പ്രഖ്യാപിച്ചുകൊണ്ട്   22.12.2017  വെള്ളിയാഴ്ച്ച  വൈകീട്ട്‌ 4 നു  പൂവത്തൂർ  കസ്‌വ  ഹാളിനടുത്ത്  നിന്ന്  തുടങ്ങി,  പാവറട്ടിയിൽ  അവസാനിക്കത്തക്ക  രീതിയിൽ  സംഘടിപ്പിച്ചിട്ടുള്ള  പ്രതിഷേധ  റാലി  എന്തുകൊണ്ടും  സ്വാഗതാർഹമാണ് .അതിൽ  ജാതി - മത - കക്ഷി - രാഷ്ട്രീയ - ഭേദമന്യേ ഭൂമിയിൽ  സത്യവും  സമാധാനവും  ശാന്തിയും  നിലനിൽക്കണമെന്നാഗ്രഹിക്കുന്ന  എല്ലാ  സുമനസ്സുകളും  അണിനിരക്കേണ്ടതാണ്.

പ്രതിഷേധ  റാലിക്ക്  എല്ലാവിധ  ആശംസകളും  നേർന്നുകൊണ്ട്,
അബ്ദുൽകാദര്‍ പുതിയവീട്ടിൽ.
Share:

Wednesday, December 20, 2017

പ്രതിഷേധ സം‌ഗമം

പാവറട്ടി:ഫലസ്ഥീന്‍ ജറുസലേം പ്രശ്‌നത്തില്‍ ലോകത്തിന്‍റെ പ്രതിഷധം ആളിക്കത്തുകയാണ്. നമുക്കും ഈ പ്രതിഷേധത്തില്‍ പങ്കു ചേരാം.ജമാ‌അത്തെ ഇസ്‌ലാമി ഗുരുവായൂര്‍ ഏരിയ നേതൃത്വം ആഹ്വാനം ചെയ്‌തു. ഡിസം‌ബര്‍ 22 വെള്ളിയാഴ്ച വെെകുന്നേരം 4 മണിക്ക് പുവ്വത്തൂര്‍ കസ്‌വ പരിസരത്തുനിന്ന് പ്രകടനം തുടങ്ങി പാവറട്ടിയില്‍ സമാപനം കുറിക്കും എന്ന്‌ സം‌ഘാടകര്‍ അറിയിച്ചു.

വിശ്വാസികളുടെ വിശുദ്ധമായ നഗരങ്ങളെയും മന്ദിരങ്ങളെയും ശത്രുക്കള്‍ തുടര്‍‌ച്ചയായി അവഹേളിച്ചു കൊണ്ടിരിക്കുമ്പോള്‍ പ്രതികരിക്കാതിരിക്കാന്‍ സാധ്യമല്ല. ആബാലവൃദ്ധം ജനങ്ങളും ഡിസംബര്‍ 22 വൈകീട്ട്‌ 4 ന്‌ മുൻമ്പുതന്നെ പ്രകടനത്തിലേയ്‌ക്ക്‌ എത്തിച്ചേരണമെന്ന്‌ ബന്ധപ്പെട്ടവര്‍ അറിയിച്ചു.

പശ്ചിമേഷ്യന്‍ രാഷ്ട്രീയത്തെ കൂടുതല്‍ സംഘര്‍ഷങ്ങളിലേക്കും ഏറ്റുമുട്ടലിലേക്കും നയിക്കുക ലക്ഷ്യമാക്കി സയണിസ്റ്റുകള്‍ വീണ്ടും അട്ടഹസിച്ച്‌ രം‌ഗത്തെത്തിയിരിക്കുന്നത്.ജറുസലേം ഇസ്രാഈല്‍ തലസ്‌ഥാനമായി പ്രഖ്യാപിച്ചു കൊണ്ടാണ്‌ പുതിയ ചുവടുവെപ്പുകള്‍ അമേരിക്ക നടത്തിയിരിക്കുന്നത്.സാം‌സ്‌കാരിക നാഗരിക മാനവിക സമൂഹത്തോട്‌ തന്നെ വെല്ലുവിളിച്ചുകൊണ്ടുള്ള ഈ പ്രഖ്യാപനം നടത്താന്‍ തെരഞ്ഞെടുത്ത ദിവസത്തിനും ചില പ്രത്യേകതകള്‍ ഉണ്ട്‌.ഇന്ത്യന്‍ ജനാധിപത്യ മര്യാദകള്‍ അതിക്രൂരമായി വ്യഭിചരിക്കപ്പെട്ട ഡിസം‌ബര്‍ 6 എന്ന കരിദിനമായിരുന്നു ഈ പ്രഖ്യാപനത്തിനും ട്രം‌പ്‌ തെരഞ്ഞെടുത്തത് എന്നത് യാദൃശ്ചികമാകാന്‍ തരമില്ല.

ജൂതരും മുസ്ലിങ്ങളും ക്രിസ്ത്യാനികളും ഒരുപോലെ പുണ്യനഗരമായി കരുതുന്ന ജറുസലേം ഇസ്രയേലിന് പതിച്ചുനല്‍കുന്നതിന് സമാനമായ നടപടിയാണ് അമേരിക്കയുടെ ഭാഗത്തുനിന്നുണ്ടായിട്ടുള്ളത്.ഡിസംബര്‍ ആറിന് വൈറ്റ്ഹൌസില്‍ നടത്തിയ 12 മിനിറ്റ് പ്രസംഗത്തിലാണ് ഇസ്രയേലെന്ന അധിനിവേശരാഷ്ട്രത്തിനും സയണിസത്തിനും അനുകൂലമായ പ്രഖ്യാപനം ട്രംപിന്റെ ഭാഗത്തുനിന്നുണ്ടായത്. ടെല്‍ അവീവിലുള്ള അമേരിക്കന്‍ എംബസി ജറുസലേമിലേക്ക് മാറ്റുമെന്ന ട്രംപിന്റെ പ്രഖ്യാപനത്തിന്റെ അര്‍ഥം തലസ്ഥാനമായി ജറുസലേമിനെയാണ് അമേരിക്ക അംഗീകരിക്കുന്നതെന്നാണ്.

ജറുസലേമിലേക്ക് എംബസി മാറ്റുന്ന ആദ്യരാഷ്ട്രവും അമേരിക്കയായിരിക്കും. 1995 ല്‍ അമേരിക്കന്‍ കോണ്‍ഗ്രസ് പാസാക്കിയ ജറുസലേം എംബസി ആക്ടിന്റെ ചുവടുപിടിച്ചാണ് ട്രംപിന്റെ പ്രഖ്യാപനം. മുന്‍ പ്രസിഡന്റുമാര്‍ നടപ്പാക്കാന്‍ മടിച്ച തീരുമാനം താന്‍ നടപ്പാക്കുന്നു എന്ന് ട്രംപ് പറയുന്നതിന്റെ അര്‍ഥമിതാണ്. 1980 ല്‍ ഇസ്രയേല്‍ അംഗീകരിച്ച അടിസ്ഥാന നിയമത്തില്‍ ജറുസലേം ഏകീകൃത ഇസ്രയേലിന്റെ തലസ്ഥാനമാണെന്ന് പ്രഖ്യാപിച്ചിരുന്നു.ഇതിന്റെ ചുവടുപിടിച്ചാണ് അമേരിക്കന്‍ നിയമനിര്‍മാണവും ഉണ്ടായിട്ടുള്ളത്.

ഇതൊരു തലസ്ഥാനമാറ്റത്തിന്റെമാത്രം കാര്യമല്ല. മറിച്ച് ഇരുരാഷ്ട്ര  രൂപീകരണത്തിലൂടെ പലസ്തീന്‍ പ്രശ്നത്തിന് സമാധാനപരമായ മാര്‍ഗങ്ങളിലുടെ പരിഹാരം കാണാനുള്ള ലോകരാഷ്ട്രങ്ങളുടെ വര്‍ഷങ്ങള്‍ നീണ്ട ശ്രമത്തിന് അന്ത്യമിടല്‍ കൂടിയാണ് ഈ നടപടി. ഇരുരാഷ്ട്ര പദ്ധതി നടപ്പാക്കുന്ന പക്ഷം പലസ്തീന്റെ തലസ്ഥാനമാകേണ്ടത് കിഴക്കന്‍ ജറുസലേമായിരുന്നു. എന്നാല്‍ 1967ലെ ആറുദിന യുദ്ധത്തില്‍ ഈ പ്രദേശം ഇസ്രയേല്‍ കീഴ്പ്പെടുത്തിയിരുന്നു. പശ്ചിമ ജറുസലേമാകട്ടെ 1948ല്‍ സാമ്രാജ്യത്വവഞ്ചനയുടെ ഫലമായി ഇസ്രയേല്‍ രൂപംകൊണ്ട വേളയില്‍ത്തന്നെ അതിന്റെ ഭാഗമായിരുന്നു. പലസ്തീന്റെ ഭാവിതലസ്ഥാനമാണ് കിഴക്കന്‍ ജറുസലേം എന്നതുകൊണ്ടുതന്നെ അവിടെ എല്ലാ അന്താരാഷ്ട്രനിയമങ്ങളും ലംഘിച്ച് ജൂത ആവാസകേന്ദ്രങ്ങള്‍ കെട്ടിപ്പൊക്കുകയായിരുന്നു ഇസ്രയേല്‍. യുദ്ധത്തില്‍ കീഴ്പ്പെടുത്തിയ പ്രദേശങ്ങളിലേക്ക് രാഷ്ട്രങ്ങള്‍ അവരുടെ ജനതയെ മാറ്റിപാര്‍പ്പിക്കരുതെന്ന 1949 ലെ നാലാം ജനീവ കണ്‍വന്‍ഷന്റെ പ്രഖ്യാപനത്തിന് കടകവിരുദ്ധമാണ് ഈ 'സെറ്റില്‍മെന്റ് കൊളോണിയലിസം' യുഎന്‍ രക്ഷാസമിതി അഞ്ച് തവണയെങ്കിലും ഈ ആവാസകേന്ദ്രനിര്‍മാണത്തിലൂടെയുള്ള അധിനിവേശത്തെ എതിര്‍ക്കുന്ന പ്രമേയം പാസാക്കിയിരുന്നു. ഇസ്രയേല്യര്‍ വര്‍ഷങ്ങളായി നടത്തിക്കൊണ്ടിരിക്കുന്ന ഈ നിയമലംഘനത്തിനാണിപ്പോള്‍ അമേരിക്ക അംഗീകാരം നല്‍കിയിരിക്കുന്നത്.
Share:

Saturday, November 18, 2017

ഉന്നത വിദ്യാഭ്യാസ പ്രോത്സാഹനം

പാടൂര്‍ : ഉന്നത വിദ്യാഭ്യാസ രം‌ഗത്ത് തല്‍‌പരരായ വിദ്യാർഥികൾക്കായി ഖത്തർ പാടൂർ വെൽഫെയർ അസോസിയേഷൻ നൽകുന്ന 'അവസരം 2017' വിദ്യാഭ്യാസ സ്കോളർഷിപ്പ് വിതരണം ചെയ്തു.

റൈഹാനത്ത്, അനുഷ, ശാഗി, നിഹാല, ഉദൈഫ് തങ്ങൾ, മുഫീദ ബത്തൂൽ, നാഫിയ, ശരണ്യ, സഞ്ജു തസ്നീം തുടങ്ങിയ പ്രദേശത്തെ വിദ്യാര്‍‌ഥികള്‍  സ്കോളർഷിപ്പിന്‌ അർഹരായി.

പാടൂർ തഅലീമുൽ ഇസ്ലാം മദ്രസ്സ ഹാളിൽ ചേർന്ന യോഗം അഡ്വ: ആർ.വി സെയ്തു മുഹമ്മദ്  ഉദ്‌ഘാടനം ചെയ്തു.  QPWA കോഡിനേറ്റർ ജാഫർ സാദിഖ് തങ്ങൾ അദ്ധ്യക്ഷത വഹിച്ചു. QPWA എക്സിക്യൂട്ടിവ് അംഗം ഫൈസൽ ഇടിയഞ്ചിറ സ്വാഗതം പറഞ്ഞു. പാടൂർ ജമാഅത്ത് സെക്രട്ടറി എ.വി സുലൈമാൻ, ട്രഷറർ എൻ.പി അലിമോൻ, അൽതാഫ് തങ്ങൾ എന്നിവർ സ്കോളർഷിപ്പ് വിതരണം നടത്തി.

ഫാറൂഖ് കാട്ടേപറമ്പിൽ, സിദ്ധീഖ് ഫൈസി മങ്കര,ബി.വി ഫക്രുദ്ധീൻ തങ്ങൾ എന്നിവർ ആശംസകള്‍ നേര്‍‌ന്നു സം‌സാരിച്ചു.QPWA എക്സിക്യൂട്ടിവ് മെമ്പർ പി.എസ് മൊയ്നുദ്ധീൻ നന്ദി പ്രകാശിപ്പിച്ചു.

Share:

Sunday, November 5, 2017

വെല്‍ഫയര്‍ സമാഹരണം

പാവറട്ടി:വെല്‍ഫയര്‍ പാര്‍‌ട്ടി ഫണ്ട്‌ സമാഹരണത്തിന്റെ പഞ്ചായത്ത്‌ തലത്തിലും പ്രാദേശിക തലത്തിലും യഥാ ക്രമം വി.എസ്‌ അബ്‌ദുല്‍ ജലീല്‍ ,മുസ്‌തഫ വടക്കന്റെ കായില്‍ എന്നീ പൗര പ്രമുഖരില്‍ നിന്നും ഫണ്ട്‌ സ്വീകരിച്ച്‌ കൊണ്ട്‌ ഉദ്‌ഘാടനം നടന്നു.വെല്‍‌ഫയര്‍ പാര്‍‌ട്ടി പാവറട്ടി പഞ്ചായത്ത് പ്രസിഡണ്ട്‌ അബ്‌ദുല്‍ ലത്വീഫ്‌ പൈങ്കണ്ണിയൂര്‍ തുക ഏറ്റുവാങ്ങി.തദവസരത്തില്‍ പാര്‍‌ട്ടി നേതാവ്‌ എ.വി ഹം‌സ ,പ്രവാസി കള്‍‌ച്ചറല്‍ ഫോറം ജില്ലാ കൗണിസില്‍ അം‌ഗം അസീസ്‌ മഞ്ഞിയില്‍ എന്നിവര്‍ സന്നിഹിതരായി. 

Share:

Saturday, November 4, 2017

ഷം‌സുദ്ധീന്‍ പി.എ മരണപ്പെട്ടു

മുല്ലശ്ശേരി:കണ്ണോത്ത് ഷം‌സുദ്ധീന്‍ പി.എ ദുബായില്‍ മരണപ്പെട്ടു.ഹൃദയാഘാതമാണ്‌ മരണ കാരണം.വെന്മേനാട്‌ കൊല്ലിങ്കല്‍ അബ്‌ദുവിന്റെയും തൊയക്കാവ്‌ സഫിയയുടെയും മകനാണ്‌ ഷംസുദ്ധീന്‍.കഴിഞ്ഞ വര്‍‌ഷം മസ്‌തിഷ്‌കാഘാതത്തെ തുടര്‍‌ന്ന്‌ സഊദി അറേബ്യയില്‍ വെച്ച്‌ മരണപ്പെട്ട അബ്‌ദുല്‍ കബീര്‍ പി.എ യുടെ സഹോദരനാണ്‌.മൃതദേഹം തുമ്പൈ അല്‍‌ഖുസൈസ്‌ ആശുപത്രിയിലാണെന്ന്‌ സുഹൃത്തുക്കള്‍ പറഞ്ഞു.
ഖബറടക്കം തിങ്കളാഴ്‌ച നവം‌ബര്‍ 6 ന്‌ കാലത്ത് 10 മണിക്ക്‌ കണ്ണോത്ത്‌ മഹല്ല്‌ ഖബര്‍‌സ്ഥാനില്‍ നടക്കുമെന്ന്‌ സഹോദരന്‍ മുഹമ്മദ്‌ ഷാഫി അറിയിച്ചു. 
Share:

Thursday, November 2, 2017

പുഴങ്ങര ഇല്ലത്ത് സെയ്‌ത്‌ മുഹമ്മദ്‌

തൊയക്കാവ്‌:പുഴങ്ങര ഇല്ലത്ത് കോഴിപ്പറമ്പില്‍ സെയ്‌ത്‌ മുഹമ്മദ്‌ ഹാജി (87) നിര്യാതനായി.വാര്‍‌ദ്ധക്യ സഹജമായ പ്രയാസങ്ങളാല്‍ ആശുപതിയില്‍ ചികിത്സയിലായിരുന്നു.സുഖം പ്രാപിച്ച്‌ കഴിഞ്ഞ ദിവസം വീട്ടിലേയ്‌ക്ക് കൊണ്ടു വന്നു.വീണ്ടും ശാരീരികമായ പ്രയാസം അനുഭവപ്പെട്ടതിനെ തുടര്‍‌ന്ന്‌ എം.ഐ ആശുപത്രിയില്‍  തീവ്ര പരിചരണ വിഭാഗത്തില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാന്‍ കഴിഞ്ഞില്ല.സന്ധ്യയോടെയായിരുന്നു അന്ത്യം.വ്യാഴാഴ്‌ച (നവം‌ബര്‍ 2)11 മണിക്ക്‌ തൊയക്കാവ്‌ മഹല്ല്‌ ഖബര്‍‌സ്ഥാനില്‍ ഖബറടക്കം നടക്കും.
മുപ്പട്ടിത്തറ ബാല ചികിത്സാ വിദഗ്ദന്‍ മുഹമ്മദ്‌ കുട്ടി വൈദ്യരുടെയും, കണ്ണോത്ത്‌ ഷാഹുല്‍ ബാവുട്ടി ഹാജിയുടെയും, അസീസ്‌ മഞ്ഞിയിലിന്റെയും ഉമ്മമാരുടെ സഹോദരിയുടെ മകനാണ്‌ പുഴങ്ങര ഇല്ലത്ത് സെയ്‌തു മുഹമ്മദ്‌.
പാടൂര്‍ അഹമ്മദ്‌ മുസ്‌ല്യാര്‍, അബ്‌ദുല്‍ റഹ്‌മാന്‍ കേലാണ്ടത്ത്,ഫാത്വിമ സലാഹുദ്ധീന്‍..തുടങ്ങിയവര്‍  സഹോദരങ്ങളാണ്‌.
ഭാര്യ:റുഖിയ.മക്കള്‍:റഫീഖ്‌,റഷീദ്‌,റസാഖ്‌,റസീന.മരുമക്കള്‍:സീനത്ത്,സഫരിയ,സജന,ഖാദര്‍കുട്ടി.
Share:

Manjiyil

Manjiyil
Manjiyil

Popular Posts

Blog Archive

Join Broadcast List

Name

Email *

Message *

Labels

Copyright © Udhayam | Powered by Blogger Design by PWT | Blogger Theme by NewBloggerThemes.com