International Udhayam

നിങ്ങള്‍ ഉത്കൃഷ്ട സമൂഹമാണ്, നന്മ കല്‍പ്പിക്കുകയും തിന്മ വിരോധിക്കുകയും ചെയ്യുന്ന സമൂഹം."...

Friday, December 7, 2018

അവിസ്‌മരണീയം ഈ അന്ത്യയാത്ര.

അവിസ്‌മരണീയം ഈ അന്ത്യയാത്ര.ഷിഹാബ്‌ എം.ഐ..
ചില മരണങ്ങൾ നമുക്ക് വലിയ പാഠങ്ങൾ നൽകുന്നതും പെട്ടെന്ന് മറക്കാൻ കഴിയാത്തതുമായി മനസ്സിൽ തങ്ങി നിൽക്കാറുണ്ട്‌.അത്തരത്തില്‍ ഒരു മരണമാണ് കഴിഞ്ഞ ദിവസം ഉണ്ടായത്. ഓടിക്കൊണ്ടിരിക്കുന്ന വണ്ടിയിൽ തെങ്ങ് വീണ് തലക്ക് ഗുരുതരമായി പരിക്ക് പറ്റി ചികിത്സ തുടരുന്നതിനിടയിൽ മരണപ്പെട്ട അബദുൽ വാജിദെന്ന 20 വയസ്സ് പ്രായമുള്ള പൊന്നു മോൻ ചെറുപ്പം മുതലേ  നേരിട്ട് പരിചയമുള്ള കുട്ടി.. 

രണ്ട് വർഷം മുമ്പ് പ്രവാസലോകത്ത് വെച്ച് പിതാവ് മസ്‌തിഷ്‌കാഘാതത്തെ തുടര്‍‌ന്ന്‌ പരലോകം പൂകിയ വേദനയിലും വേര്‍പാടിലും ദിനങ്ങൾ മുന്നോട്ട് നീക്കിയിരുന്ന പൊന്നുമോൻ.കുടുംബ പരമായി എൻറെ അനുജത്തിയുടെ സഹോദരി പുത്രനാണ്.എപ്പോൾ എവിടെവെച്ച് കണ്ടാലും പുഞ്ചിരിക്കുന്ന മുഖവുമായി വിശേഷങ്ങൾ ആരായുന്ന മോൻ....... 

പല മരണങ്ങളിലും ഞാൻ പങ്കെടുത്തിട്ടുണ്ട്. ജനാസയെ അനുഗമിക്കുകയും നിസ്ക്കാരവും ഖബറടക്കവും കഴിഞ്ഞതിനു ശേഷമേ തിരിച്ച്‌ പോരാറുളളൂ. പണ്ഡിതൻമാരുടെ ജനാസയിലാണ് ജനങ്ങളുടെ ആധിക്യം നേരിട്ട് കണ്ടിട്ടുള്ളത്. ആ ഒരു അവസ്ഥയായിരുന്നു  സാധാരണക്കാരില്‍ സാധാരണക്കാരനായ വാജിദെന്ന പൊന്നുമോൻറെ ജനാസയിൽ കാണാൻ കഴിഞ്ഞത്.വാടാനപ്പളളിയിലും പാടൂരുമായി ഒഴുകിയെത്തിയ ജനസാഗരം മഹാ സമ്മേളനങ്ങളെ വെല്ലുന്നതായിരുന്നു.

അബ്ദുൽ വാജിദിനെ നെഞ്ചിലേറ്റിയ സുഹൃത്തുക്കൾ ജേഷ്ഠന്മാർ  അക്ഷരാർത്ഥത്തിൽ പാടൂർ പള്ളിയും ഖബർസ്ഥാനും വീർപ്പ് മുട്ടിയ നിമിഷങ്ങൾ.രാത്രി 9 മണിക്കാണ് ജനാസ പള്ളിയിൽ എത്തുന്നത്.പരന്നൊഴുകുന്ന ജനസഞ്ചയം, പരിസര പ്രദേശങ്ങളിലെ നാനാഭാഗത്ത് നിന്നും പാഞ്ഞെത്തിയ സഹോദരങ്ങൾ, വേർതിരിവില്ലാതെ തല മുതിർന്നവർ രാഷ്ട്രീയ സാമൂഹ്യ സാംസ്കാരിക വിദ്യാഭ്യാസ മേഖലകളിലെ പ്രമുഖർ ധാരാളം. എല്ലാറ്റിനും സാക്ഷിയെന്നോണം തന്റെ ജ്ഞാന ഗോപുരത്തിൽ വിടർന്ന പുഞ്ചിരിയുമായി വാജിദിൻറെ ജനാസ. സാധാരണഗതിയില്‍ ഒറ്റതവണയെ മയ്യിത്തിന്റെ മുഖം ഞാൻ  നോക്കാറുള്ളൂ.പതിവ് തെറ്റിക്കുക തന്നെ ചെയ്തു.പുഞ്ചിരി തൂകി കിടക്കുന്ന ആ മോൻറെ പൂമുഖത്തേക്ക് പലവട്ടം നോക്കി. ചുറ്റും കൂടി കണ്ണ് നീർ തുടക്കുന്ന, വിങ്ങി വിങ്ങി തേങ്ങുന്ന പലരിൽ ഒരുവനായി ഈയുള്ളവനും.ഖുര്‍ആന്റെ ഹൃദയമായ യാസീൻ ഓതി പ്രാർത്ഥിച്ചു. പിന്നീട് ഫാതിഹ , ഇഖ്‌ലാസ്, മുഅവ്വദത്തൈനി ഓതി തഹ്‌ലീൽ ചൊല്ലി.ഖൽബിൽ തട്ടിയ പ്രാർത്ഥന നടത്തി.

തൃശ്ശൂർ ജൂബിലി മിഷൻ ആശുപത്രിയിൽ നിന്നും രണ്ട് മണിയോടെ മുളം കുന്നത്ത് കാവ് മെഡിക്കൽ കോളജ് മോർച്ചറിയുടെ പോസ്റ്റ്മോർട്ടം കൗണ്ടറിൽ എത്തിച്ചു.പോസ്റ്റ് മോർട്ടത്തിനു ശേഷം വൈകീട്ട് അഞ്ചു മണിയോടെ എസ്‌.വൈ.എസ്‌ സാന്ത്വനം സെൻറെറിൽ മയ്യിത്ത് കുളിപ്പിക്കാൻ എത്തി. അവിടുത്തെ ഉസ്‌താദിൻറെ നേതൃത്വത്തിൽ ഞാനടക്കം മൂന്ന് പേരാണ് മയ്യിത്ത് കുളിപ്പിക്കാൻ ഉണ്ടായിരുന്നത്.കഫൻ ചെയ്‌തതിനു ശേഷം പള്ളിയിൽ നിന്നും മഗ്‌രിബ് ബാങ്കൊലി. ജമാഅത്തിന് ജനങ്ങൾ അണിനിരന്നു.മയ്യിത്ത് പള്ളിയിൽ കയറ്റി.നിസ്‌കാര ശേഷം ജനാസ നിസ്കാരം സാന്ത്വനം സെൻറെറിലെ ഉസ്‌താദ് നേതൃത്വം നൽകി.ദുആക്ക് ശേഷം ജനാസയുമായി വാടാനപ്പളളിയിലെ വീട്ടിലേക്ക് ആംബുലൻസിൽ തഹ്‌ലീല്‍ ചൊല്ലികൊണ്ട് നീങ്ങി. ഏഴര മണിയോടെ മയ്യിത്ത് വീട്ടിൽ എത്തി. ഉറ്റവരെ കാണിക്കാൻ വീടിനകത്ത് വെച്ച് ജനാസ വെച്ചപ്പോഴും സകല നിയന്ത്രണങ്ങളും വിട്ട് ഒരു നോക്ക് കാണാൻ ബന്ധുക്കളും ശേഷം പുറത്ത് വെച്ചപ്പോഴും സുഹൃത്തുക്കൾ അടക്കമുള്ള സഹോദരങ്ങൾ എല്ലാവരുടേയും അവസാന നോക്കിനു ശേഷം വീട്ടിലെ നിസ്ക്കാരം.ശേഷം പാടൂരിലെ ഉമ്മയുടെ വീട്ടിലും പൊതുദർശനം.

എത്രമേൽ ജന ഹൃദയങ്ങളിൽ പ്രിയങ്കരനായിരുന്നു വാജിദ്  എന്നതിന്റെ തെളിവാണ്  വാടാനപ്പളളിയിലെ വീട്ടിലും പാടൂർ ജുമുഅത്ത് പള്ളിയിലും കണ്ടത്.......  ജനപ്രവാഹം രാത്രി ജനാസ മറവ് ചെയ്യുമ്പോഴും അതിന് ശേഷവും തുടരുകയായിരുന്നു.

നാഥനായ റബ്ബിൻറെ തീരുമാനം അത് യഥാസമയം നടന്നു കഴിഞ്ഞു റബ്ബ് നാമെല്ലാവരേയും അപകട മരണങ്ങളിൽ നിന്നും രക്ഷപ്പെടുത്തി തരുമാറാകട്ടെ.വിടപറഞ്ഞ വാജിദിൻറെ ബർസഖിയായ ജീവിതം പ്രഭാ പുരിതമാക്കട്ടെ.പാപങ്ങൾ പൊറുത്ത് കൊടുക്കട്ടെ. സ്വർഗ്ഗം നൽകി അനുഗ്രഹിക്കട്ടെ.മകൻറെ വേർപാടിൽ വിഷമിക്കുന്ന മാതാവിനും സഹോദരനും കുടുംബങ്ങൾക്കും അല്ലാഹു  ക്ഷമയും സമാധാനവും  നൽകി അനുഗ്രഹിക്കട്ടെ..

ഷിഹാബ്‌ എം.ഐ
Share:

Monday, December 3, 2018

വാജിദ്‌ കബീര്‍ യാത്രയായി

മുല്ലശ്ശേരി:ഉദയം പഠനവേദിയുടെ മുന്‍‌കാല പ്രവര്‍‌ത്തകന്‍ പരേതനായ അബ്‌ദുല്‍ കബീറിന്റെ മൂത്ത പുത്രന്‍ വാജിദ്‌ കബീര്‍ അല്ലാഹുവിലേയ്‌ക്ക്‌ യാത്രയായി.കഴിഞ്ഞ വാരത്തില്‍ നടന്ന ബൈക്ക്‌ അപകടത്തില്‍ പെട്ട്‌ തൃശൂരില്‍ ചികിത്സയിലായിരുന്നു.2016ല്‍ അബ്‌ദുല്‍ കബീര്‍ മസ്‌തിഷ്‌കാഘാതത്തെ തുടര്‍‌ന്ന്‌ സ‌ഊദി അറേബ്യയില്‍ വെച്ച്‌ നിര്യാതനായി.2017ല്‍ അബ്‌ദുല്‍ കബീറിന്റെ അനുജന്‍ എമിറേറ്റ്‌സില്‍ വെച്ചും മരണമടഞ്ഞിരുന്നു.

കണ്ണോത്ത് മഹല്ല്‌ ഖബര്‍‌സ്ഥാനിലായിരുന്നു അബ്‌ദുല്‍ കബീറിനെ ഖബറടക്കിയത്. അബ്‌ദുല്‍ വാജിദ്‌ അബ്‌ദുല്‍ കബീറിന്റെ മയ്യിത്ത് വാടാനപ്പള്ളിയിലെ വസതിയില്‍ എത്തിച്ച ശേഷം പാടൂര്‍ മഹല്ല്‌ ഖബര്‍‌സ്ഥാനില്‍ വൈകുന്നേരം ഖബറടക്കുമെന്ന്‌ ബന്ധുക്കള്‍ അറിയിച്ചു.

ഉദയം പഠനവേദി,നന്മ തിരുനെല്ലുര്‍ തുടങ്ങിയ പ്രദേശത്തേയും പ്രവാസലോകത്തേയും സം‌ഘടനകള്‍ അനുശോചനം രേഖപ്പെടുത്തി.
Share:

Sunday, October 28, 2018

നന്ദികെട്ടവനാണ്‌ മനുഷ്യന്‍

പാവറട്ടി: പ്രകൃതിക്ക് മേൽ സ്വാര്‍‌ഥനായ മനുഷ്യന്റെ അനാവശ്യ കൈ കടത്തലുകളാണ് ദുരന്തങ്ങൾക്ക് കാരണമാകുന്നതെന്ന്‌ ചിന്തകനും  സഹൃദയ ലോകത്തിന്റെ ഹൃദയം  കീഴടക്കിയ  എഴുത്തുകാരനുമായ ശ്രീ.പി.സുരേന്ദ്രൻ പറഞ്ഞു.
സോളിഡാരിറ്റി യൂത്ത് മൂവ്മെന്റ് ചാവക്കാട് ഏരിയ പാവറട്ടി കോപ്പറേറ്റീവ് ബാങ്ക് ഓഡിറ്റോറിയത്തിൽ സംഘടിപ്പിച്ച   സ്നേഹ  സംഗമം ഉദ്ഘാടനം ചെയ്‌ത്‌ സംസാരിക്കുകയായിരുന്നു അദ്ദേഹം.

വിവിധ ആരാധനാലയങ്ങളിലും അനുബന്ധ സ്ഥാപനങ്ങളിലും ആര്‍‌ക്കും കടന്നു വരാമെന്നും വേണ്ടിവന്നാല്‍ ദിവസങ്ങളോളം താമസിക്കാമെന്നും നാം ലോകത്തിനു കാട്ടിക്കൊടുത്തു.പ്രത്യേകിച്ച്‌ ഇവിടെ ഒന്നും സം‌ഭവിക്കാന്‍ പോകുന്നില്ല.എന്നാല്‍ ദുരന്തം വിട്ടൊഴിഞ്ഞപ്പോള്‍ നാം പറയുന്നത് തികച്ചും വികൃതമായ ന്യായങ്ങളാണെന്നും ഒരു ദുരന്തം തന്നെ തീര്‍‌ക്കാനുള്ള തയ്യാറെടുപ്പിലാണ്‌ നന്ദികെട്ട മനുഷ്യനെന്നും സുരേന്ദ്രന്‍ പരിതപിച്ചു.

ജമാ‌അത്തെ ഇസ്‌ലാമി ഏരിയ പ്രസിഡന്റ്‌ എ.വാഹിദ്‌,സോളിഡാരിറ്റി ജില്ല സെക്രട്ടറി കെ.എം സാബു,അബ്‌ദുല്‍ സലാം കൈതമുക്ക്‌,ലത്വീഫ്‌ കൈതമുക്ക്‌,അഹമ്മദ്‌ കവല,പരിസ്ഥിതി പ്രവര്‍‌ത്തകന്‍ ഉസ്‌മാന്‍ കൂരിക്കാട്‌ എന്നിവര്‍ പ്രളയകാലാനുഭവങ്ങളും വര്‍‌ത്തമാന കാല രാഷ്‌ട്രിയ വൃത്താന്തങ്ങളും പങ്കുവെച്ചു.

സമദ് കുന്നക്കാവ് മുഖ്യ പ്രഭാഷണം നടത്തി. സോളിഡാരിറ്റി ചാവക്കാട് ഏരിയ പ്രസിഡന്റ്‌ സുഹൈൽ  അധ്യക്ഷത വഹിച്ചു. അസീസ് മഞ്ഞിയിൽ സ്വാഗതവും എ.വി ഹംസ മാസ്റ്റർ നന്ദിയും പറഞ്ഞു
Share:

Sunday, September 23, 2018

ഹയര്‍ സെക്കന്ററി കോണ്‍‌ഫറന്‍‌സ്‌

തൃശൂര്‍:ജീവിതത്തിന്റെ എല്ലാ മേഖലകളിലും വിശിഷ്യാ വിദ്യാഭ്യാസ രംഗത്ത് വിപ്‌ളവകരമായ ഔന്നത്യത്തിന്‌ ജി.ഐ.ഒ എന്ന സുഭദ്രവും സുശക്തവുമായ കണ്ണിയില്‍ അണിചേര്‍ന്ന്‌ പ്രവര്‍‌ത്തന നിരതമാകേണ്ടത് കാലഘട്ടത്തിന്റെ തേട്ടമത്രെ.തൃശുര്‍ ജില്ലാ ജമാ‌അത്തെ ഇസ്‌ലാമി പ്രസിഡന്റ്‌ എം.എ ആദം സാഹിബ്‌ പറഞ്ഞു.സമൂഹത്തിലെ സാം‌സ്‌കാരികമായ മുന്നേറ്റത്തില്‍ സ്‌ത്രീയുടെ പ്രാധിനിത്യം അനിഷേധ്യമത്രെ.പ്രസ്‌തുത പ്രാധിനിത്യത്തെ യഥാ സമയങ്ങളില്‍ പരിപോഷിപ്പിച്ച്‌ കൊണ്ടിരിക്കുന്ന ഉത്തരവാദിത്വമുള്ള സം‌ഘവും സംഘടനയുമാണ്‌ ഗേള്‍‌സ്‌ ഇസ്‌ലാമിക് ഓര്‍‌ഗനൈസേഷന്‍ എം.എ ആദം സാഹിബ്‌ ഓര്‍‌മ്മിപ്പിച്ചു.ജി.ഐ.ഒ തൃശൂര്‍ ജില്ല ഘടകം സം‌ഘടിപ്പിച്ച ഹയര്‍ സെക്കന്ററി കോണ്‍‌ഫറന്‍‌സ്‌ ഉദ്‌ഘാടനം ചെയ്യുകയായിരുന്നു അദ്ദേഹം.

ഇന്ത്യന്‍ മുസ്‌ലിം‌കളും ചരിത്രവും രാഷ്‌ട്രീയവും,ക്യാമ്പസ്‌ രാഷ്‌ട്രീയ ഇടപെടല്‍,നവ സ്‌ത്രീ വാദങ്ങള്‍ ആയിഷയിലേയ്‌ക്കുള്ള ദൂരം തുടങ്ങിയ വിഷയങ്ങളില്‍ യഥാ ക്രമം നവാസ്‌ കെ.എസ്‌,ഷഫ്‌റിന്‍ കെ.എം,നൗഷബ നാസ്‌ തുടങ്ങിയവര്‍ വിഷയാവതരണം നടത്തി.

ജി.ഐ.ഒ ഏരിയ പ്രസിഡന്റ്‌ ഇര്‍‌ഫാന കെ.ഐ യുടെ ഖുര്‍‌ആന്‍ പഠനത്തോടെ ആരം‌ഭിച്ച കോണ്‍‌ഫറന്‍‌സില്‍ ജി.ഐ.ഒ തൃശൂര്‍ ജില്ല പ്രസിഡന്റ്‌  ഫാത്വിമ ജുമാന അധ്യക്ഷത വഹിച്ചു.പ്രോഗ്രാം കണ്‍‌വീനര്‍ ജിന്‍സിയ പി.എ സ്വാഗതം ആശം‌സിച്ചു.

ഹിബ മഞ്ഞിയില്‍,മഹ്‌ഫൂസ മന്‍സൂര്‍ തുടങ്ങിയവര്‍ നേതൃത്വം നല്‍കിയ പരിപാടി റഹ്‌മത്തുന്നിസ വി.എയുടെ സന്ദേശത്തോടെ സമാപനം കുറിച്ചു.

Share:

Sunday, August 5, 2018

കേലാണ്ടത്ത് ഫാത്വിമ മരണപ്പെട്ടു

വെന്മേനാട്‌:സലാഹുദ്ധീന്‍ മുസ്ല്യാരുടെ ഭാര്യ കേലാണ്ടത്ത് ഫാത്വിമ പാടൂര്‍  അല്ലാഹുവിലേയ്‌ക്ക്‌ യാത്രയായിരിക്കുന്നു.ഫാത്വിമയുടെ നാത്തൂന്‍ ചാങ്കര സൈനബ അഹമ്മദ്‌ ഗള്‍‌ഫിലേയ്‌ക്ക്‌ യാത്രക്കൊരുങ്ങിയിരിക്കെ കഴിഞ്ഞ ദിവസമാണ്‌ മരണപ്പെട്ടത്.പ്രമേഹ രോഗത്താല്‍ ഏറെ പ്രയാസമുണ്ടായിരുന്നതായി അറിയുന്നു.ശാരീരിക അസ്വസ്ഥതകളെ തുടര്‍‌ന്ന്‌ ആശുപത്രിയില്‍ കാണിച്ചിരുന്നു.രാത്രി വീണ്ടും പ്രയാസം അനുഭവപ്പെട്ടപ്പോള്‍ തൃശൂര്‍ അമല ആശുപത്രിയിലേയ്‌ക്ക്‌ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

പരേതനായ തൊയക്കാവ്‌ സെ്‌യ്‌തു മുഹമ്മദ്‌,പരേതനായ പാടൂര്‍ അഹമ്മദ്‌ മുസ്‌ല്യാര്‍, കേലാണ്ടത്ത് അബ്‌ദുറഹിമാന്‍ എന്നിവരുടെ സഹോദരിയാണ്‌ ഫാത്വിമ.അസീസ്‌ മഞ്ഞിയിലിന്റെ മൂത്തുമ്മയുടെ മകള്‍.

ഖബറടക്കം ഇന്ന്‌ തിങ്കളാഴ്‌ച 06.08.2018 ന്‌ വൈകീട്ട്‌ വെന്മേനാട്‌ പള്ളി ഖബര്‍‌സ്ഥാനില്‍ നടക്കുമെന്ന്‌ ബന്ധുക്കള്‍ അറിയിച്ചു.
Share:

Thursday, August 2, 2018

സൈനബ മരണപ്പെട്ടു

പാടൂർ:കേലാണ്ടത്ത് പരേതനായ അഹമ്മദ് മുസ്ല്യാരുടെ ഭാര്യ തിരുനെല്ലൂർ ചാങ്കര റുഖിയ്യയുടെ മകള്‍ സൈനബ ഇന്ന്‌ പുലര്‍‌ച്ചയ്‌ക്ക്‌ മരണപ്പെട്ടു.മകന്‍ ഷാഹുല്‍ യു.എ.ഇ യില്‍ നിന്നും ഇന്ന്‌ വൈകുന്നേരത്തോടെ നാട്ടിലെത്തും രാത്രി 8 മണിയോടു കൂടെ പാടൂർ പള്ളി ഖബർസ്ഥാനിൽ ഖബറടക്കം നടക്കും.

സൈനബ ഇന്ന്‌ അബുദാബിയിലേയ്‌ക്കുള്ള യാത്രാ ഒരുക്കത്തിലായിരുന്നു. അബ്‌ദു റഹിമാന്‍ കേലാണ്ടത്തിന്റെ സഹോദരന്റെ ഭാര്യയും അസീസ്‌ മഞ്ഞിയിലിന്റെ മൂത്തുമ്മയുടെ മകന്റെ ഭാര്യയുമാണ്‌ നിര്യാതയായ സൈനബ.
ഉദയം പഠനവേദി സഹോദരിയുടെ നിര്യണത്തില്‍ ദുഃഖം രേഖപ്പെടുത്തി.
Share:

Tuesday, July 31, 2018

ചൊവല്ലൂര്‍പടി ജലാല്‍ മരണപ്പെട്ടു

ദോഹ: ഖത്തറിൽ ദീർഘകാല പ്രവാസിയും ഗുരുവായൂർ, ചൊവ്വല്ലൂർപടി സ്വദേശിയുമായ ജലാല്‍ ഹൃദയ സ്തംഭനം മൂലം തിങ്കളാഴ്ച (ജൂലായ്‌ 30) രാത്രി 9 മണിയോടെ മരണമടഞ്ഞു.ജോലി സ്ഥലത്ത് കുഴഞ്ഞ്‌ വീണതിനെ തുടര്‍‌ന്ന്‌ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

കുടുംബം ഖത്തറിലുണ്ട്‌.പരേതന്റെ മൂത്ത മകൾ ലുലു ജലാല്‍ ഖത്തർ ഫൗണ്ടേഷന്റെ  കീഴിലുള്ള കോളേജിലും രണ്ടാമത്തെ മകൻ തമീം ജലാല്‍ എം.ഇ.എസ് സ്ക്കൂളിൽ പ്ലസ്‌ടു വിലും പഠിക്കുന്നു.അൽഖോർ ആശുപത്രി മോർച്ചറിയിൽ സൂക്ഷിച്ചിട്ടുള്ള മൃത ദേഹം നടപടി ക്രമങ്ങൾക്ക് ശേഷം നാട്ടിൽ കൊണ്ടു പോയി മറവ് ചെയ്യുമെന്ന്‌ ബന്ധുക്കള്‍ അറിയിച്ചു.

ഭാര്യ:-നൂര്‍ജഹാന്‍,മക്കള്‍:-ലുലു ജലാല്‍,തമീം ജലാല്‍. പിതാവ്‌:-പരേതനായ കുഞ്ഞു മുഹമ്മദ്‌ ചൊവല്ലൂര്‍പടി,മതാവ്‌:- പരേതനായ വെന്മേനാട്‌ പി.സി മുഹമ്മദിന്റെ പരേതയായ മൂത്ത സഹോദരി സൈനബ. സഹോദരങ്ങള്‍:-റസിയ,റഫീഖ്‌,സലീം,റഹ്‌മാന്‍,ഷാജി,ജുനൈദ്,ഷൗകത്ത്,മുന്തസ്.

ജലാല്‍ ചൊവ്വല്ലൂര്‍പടിയുടെ ആകസ്‌മിക നിര്യാണത്തില്‍ ഉദയം പഠന വേദി ദുഃഖം രേഖപ്പെടുത്തി.

മരണാനന്തര ഔദ്യോഗിക നടപടി ക്രമങ്ങളില്‍ സഹായിക്കാനും സഹകരിക്കാനും വി.എം റഫീഖും (ഉദയം) സി.എഫ് ജന സേവന വിഭാഗവും രം‌ഗത്തുണ്ട്‌.

അല്‍‌ഖോര്‍ ആശുപത്രി പരിസരത്ത് ഇന്ന്‌ ജൂലായ്‌ 31 ചൊവ്വാഴ്‌ച വൈകീട്ട്‌ 8 മണിക്ക്‌ പരേതനു വേണ്ടിയുള്ള നമസ്കാരം നടക്കുമെന്ന്‌ അടുത്ത ബന്ധുക്കള്‍ പറഞ്ഞു.മൃതദേഹം നാളെ ആഗസ്റ്റ് ഒന്നിന്‌ ബുധനാഴ്‌ച നാട്ടില്‍ ഖബറടക്കാന്‍ കഴിയും വിധം കൊണ്ടു പോകാന്‍ കഴിയുമെന്ന്‌ പരേതന്റെ ബന്ധുവായ വി.എം റഫീഖ്‌ അറിയിച്ചു.
Share:

Thursday, July 19, 2018

ഖുബ മദ്രസ്സാ പ്രവര്‍‌ത്തനം പുനഃക്രമീകരിച്ചു

പാവറട്ടി:ഖുബ മദ്രസ്സയുടെ പഠന സമയത്തിലും പഠന രീതിയിലും അവശ്യം ആവശ്യമായ മാറ്റങ്ങള്‍ വരുത്തി പ്രവര്‍‌ത്തന സജ്ജമായതായി ഖുബ ട്രസ്റ്റ് വൃത്തങ്ങള്‍ അറിയിച്ചു.പരിസരത്തെ രക്ഷാകര്‍ത്താക്കളുടെ പ്രത്യേക യോഗം വിളിച്ച് ചേര്‍‌ത്ത് അഭിപ്രായ സമന്വയത്തിനു ശേഷമാണ്‌ പുതിയ ക്രമം രൂപപ്പെടുത്തിയത് എന്ന്‌ ബന്ധപ്പെട്ടവര്‍ പറഞ്ഞു.

കാലത്ത് 06.30 മുതല്‍ 07.30 വരെ ആഴ്‌ചയില്‍ അഞ്ചു ദിവസമായിരിയ്‌ക്കും മദ്രസ്സാ പഠന സമയം.വാരാന്ത ദിവസങ്ങള്‍ വിദ്യാര്‍‌ഥികളുടെ സൗകര്യം പരിഗണിച്ച് യഥോചിതം ഉപയോഗപ്പെടുത്താമെന്നും രക്ഷാകര്‍‌ത്താക്കളുടെ യോഗത്തില്‍ ധാരണയായി.ഖു‌ര്‍ആന്‍ മാത്രം പഠിപ്പിക്കാന്‍ ഒരു ഹാഫിദിനെയും പൊതു വിഷയങ്ങളില്‍ പ്രാവീണ്യമുള്ള മറ്റൊരു അധ്യാപകനെയും മദ്രസ്സയുടെ ഉത്തരവദിത്തത്തിനു നിയോഗിച്ചിട്ടുണ്ട്‌.

മദ്രസ്സയുമായി ബന്ധപ്പെട്ട കൂടുതല്‍ വിവരങ്ങള്‍‌ക്ക്‌ എ.വി ഹം‌സ മാസ്റ്ററുമായി ബന്ധപ്പെടാവുന്നതാണ്‌. + 91 9447855415

Share:

Wednesday, July 18, 2018

അബ്‌ദുല്‍ ജലീല്‍ മരണപ്പെട്ടു

പാടൂര്‍:കുഞ്ഞു മുഹമ്മദ്‌ മാസ്റ്ററുടെ മൂത്ത മകന്‍ അബ്‌ദുല്‍ ജലീല്‍ മരണപ്പെട്ടു.പാടൂര്‍ ഹല്‍‌ഖ അം‌ഗവും മസ്‌ജിദ്‌ റഹ്‌മയും അനുബന്ധ സംവിധാനങ്ങളിലും സജീവ സാന്നിധ്യവുമായിരുന്നു. പ്രസ്ഥാന പ്രവര്‍‌ത്തകന്‍ മെഹ്‌ബൂബ് (ദുബൈ) സഹോദരനാണ്‌.ഖബറടക്കം പാടൂര്‍ മഹല്ല്‌ ഖബര്‍‌സ്ഥാനില്‍ നാളെ നടക്കും. 

ഉദയം പഠനവേദിയും അനുബന്ധ ഘടകങ്ങളും അനുശോചനം രേഖപ്പെടുത്തി.
Share:

Tuesday, July 17, 2018

ഒരു അ,ആ പദ്ധതി

നമ്മുടെ ഗ്രാമന്തരീക്ഷത്തെ ഹൃദയ ഹാരിയായ സംസ്‌കാരത്തിന്റെ കളിത്തൊട്ടിലാക്കി കാലാന്തരത്തില്‍ മാറ്റിപ്പണിയാനുതകും വിധമുള്ള ഒരു വിഭാവനയുടെ ഹൃസ്വ ചിത്രമാണിത്.നന്മയുടെ പ്രസാരണം ദൗത്യമായി അം‌ഗീകരിക്കാന്‍ സന്മനസ്സുള്ള ആരേയും ആകര്‍‌ഷിക്കാനും ചിന്തിപ്പിക്കാനും ഈ നഖചിത്രത്തിനു കഴിയുമെന്നു വിശ്വസിക്കുന്നു.കായികാധ്യാപകനും മനശാസ്‌ത്രത്തില്‍ ബിരുദവുമുള്ള  എ.കെ മെഹ്‌ബൂബ്‌ പാടൂര്‍ തയാറാക്കിയ ഈ കരട്‌ പടം ഇവിടെ പങ്കുവെക്കുന്നു. 

ക്ഷേമാശ്വര്യങ്ങള്‍ നേരുന്നു...
മാറ്റം മനുഷ്യജീവിതത്തിലെ ഒരു അനിവാര്യതയാണ്.അതിനാൽ മാറ്റത്തെ ചെറുക്കാനല്ല,അതിനെ എങ്ങിനെ ക്രിയാത്മകമായി പ്രയോജനപ്പെടുത്താം എന്നാണ് ചിന്തിക്കേണ്ടത്.എന്നത്രെ ആപ്‌ത വാക്യം. 

ഒരു വിഭാവനയുടെ രൂപ ഘടനയ്ക്കുള്ള പ്രാഥമിക ശ്രമം:-
മനുഷ്യന് ഏത് മേഖലയിലും അർപ്പിതമായ കഴിവുകൾ നന്മയുടെ മാർഗ്ഗത്തിലുടെ എന്ന ആശയത്തോടെ ഒരു പദ്ധതി പരിചയപ്പെടുത്താനുള്ള എളിയ ശ്രമം അള്ളാഹു അനുഗ്രഹിക്കട്ടെ.

നമ്മുടെ ഗ്രാംങ്ങളിലെ സകല ജന സമൂഹത്തേയും കൈകോർത്ത് കൊണ്ടുപോകുന്നതിനുള്ള വിഭാവനയുടെ ആവിഷ്‌കാരമാണ്. പരസ്‌പരം കൈകോർക്കാനുള്ള സാഹചര്യം ഉണ്ടാക്കുമ്പോൾ നമുക്ക്‌ മുന്നിൽ ദൈവാനുഗ്രഹത്താല്‍ വിശാലമായ വാതിലുകള്‍ തുറക്കപ്പെടും.വലിയ മാതൃക സൃഷ്ടിക്കപ്പെടും. ഇസ്ലാമിക കാഴ്ചപ്പാടോടുകൂടി നിര്‍‌മ്മിക്കാന്‍ ഉദ്ദേശിക്കുന്ന ആശയത്തിന്റെ പേരാണ് അറിവും ആരോഗ്യവും എന്ന പേരിനെ സൂചിപ്പിക്കുന്ന "അആ"കേന്ദ്രം.ഭാവി ആസുത്രണങ്ങളുടെയും പുരോഗതിയുടെയും നിതാനമായി നാഴിക കല്ലായി ഈ വിഭാവന മാറിയേക്കും.

മാനത്തോളം പ്രതീക്ഷിക്കുമ്പോള്‍ മാവിന്‍ ശിഖിരത്തോളമെങ്കിലും എന്നൊരു പഴമൊഴി ഏറെ പ്രസിദ്ധമാണ്‌.ഇത്തരം പ്രചോദനപരമായ പാഠങ്ങളില്‍ നിന്നാണ്‌ പുതിയ വിഭാവനാ പൂര്‍‌ണ്ണമായ ആശയങ്ങള്‍ കൂമ്പിടുന്നത്.ഇവ്വിധം പ്രാരം‌ഭം കുറിക്കപ്പെടുന്ന സര്‍‌ഗാത്മകവും ക്രിയാത്മകവുമായ കാര്യങ്ങള്‍ പ്രാര്‍‌ഥനാ നിര്‍‌ഭരമായ മനസ്സോടുകൂടെ നിര്‍‌വഹിക്കുമ്പോള്‍ പുഷ്‌കലമാകാതിരിക്കുകയില്ല.

ശുദ്ധ ഗ്രാമീണതയുടെ സകല ഐശ്വര്യങ്ങളും പൂത്തുലയുന്ന പ്രദേശങ്ങലാണ്‌ ഓരോ ഗ്രാമവും.ഈ നിഷ്‌കളങ്ക പ്രകൃതത്തെ സജീവമാക്കി ഹരിതാഭമാക്കി നില നിര്‍ത്തുന്നതിന്‌ ബോധ പൂര്‍‌വ്വം ശ്രമങ്ങള്‍ ആവശ്യമാണ്‌.അഥവാ പരമ്പരാഗത ബഹുസ്വരതയെ ഇണക്കിച്ചേർക്കുന്നതിനു് ഒരു വിശാല പദ്ധതി അനിവാര്യമാണ്‌. ഇതത്രെ വര്‍‌ത്തമാന കാലത്തിന്റെ തേട്ടം.
ജാതിമത ലിംഗഭേദമന്യേ പദ്ധതി പ്രദേശത്തെ എല്ലാ മനുഷ്യർക്കുമാണ്‌ ഈ സംരംഭം. ധാര്‍‌മ്മികവും, സംസ്കാരികവും,കലാപരവും, കായികവും, നാഗരികവുമായ ഔന്നത്യത്തിലേക്കുള്ള ഒരു സമൂഹത്തിന്റെ സ്വഭാവിക പദ്ധതിയാണിത്.

വിഭാവനാ പൂര്‍‌ണ്ണമായ പദ്ധതിയുടെ സവിശേഷതകളിലെന്നായി എടുത്തു ഉദ്ധരിക്കപ്പെടാവുന്ന കാര്യം.ഒരു ആയുഷ്‌കാലം മുഴുവന്‍ നന്മയുടെയും അറിവിന്റെയും ആരോഗ്യത്തിന്റെയും മാർഗ്ഗത്തിൽ മുഴുവൻ സമയവും ചിലവഴിക്കാനുള്ള ഒരു കേന്ദ്രമായി ഈ പദ്ധതി അടയാളപ്പെടുത്തപ്പെടണം.

മനുഷ്യർക്കു വേണ്ടി ഉയിർത്തെഴുന്നേൽപ്പിക്കപ്പെട്ട ഒരു സമുദായമെന്ന ഖുർആനിന്റെ വിശേഷണത്തിലേക്ക് വരുന്നതിനു വേണ്ടി ഒന്നിച്ചു പ്രവർത്തിക്കാവുന്ന ഒറ്റ വേദികയുടെ അഭാവം നമ്മുടെ ഗ്രാമഗ്രാമാന്തരങ്ങളിലൊക്കെയുണ്ട്. എല്ലാ കൂട്ടുകാരുടെയും സഹോദരിസഹോദന്മാരുടെയും കൂട്ടായ സഹായ സഹകരണം ഒന്നിച്ച് ഉണ്ടാകുമ്പോൾ നാട് മറ്റൊരു തലത്തിൽ ഭൂപടത്തിൽ ഇടം പിടിക്കും.

ആമുഖം ഇവിടെ അവസാനിപ്പിക്കുന്നു.

അന്തർദേശീയ നിലവാരത്തിൽ വിഭാവന ചെയ്യുന്ന ഈ പദ്ധതിയെ രണ്ടായി തിരിക്കാം.

ഒന്നാം ഘട്ടം .ഭുമി (വസ്തു) കണ്ടെത്തുക.
ഗ്രാമന്തരീക്ഷത്തില്‍ അല്ലെങ്കിൾ കിട്ടാവുന്ന ഇടത്തില്‍. 50 സെന്റ് ഭുമി നേടിയിടുക്കുക (വാങ്ങിയും, നല്‍‌കിയും) എന്നതാണ് മുഖ്യ ദൗത്യം. അതിനാൽ ഇതിനോട് സമാന ചിന്തയുള്ളവരും നന്മ കാക്ഷിക്കുന്നവരും സമ്മേളിക്കുക.

അല്ലാഹുവിന് ഉത്തമമായ കടം നല്‍കുന്ന ആരുണ്ട്? എങ്കില്‍ അല്ലാഹു അത് അയാള്‍ക്ക് ധാരാളമായി ഇരട്ടിപ്പിച്ചുകൊടുക്കും. ധനം പിടിച്ചുവെക്കുന്നതും വിട്ടുകൊടുക്കുന്നതും അല്ലാഹുവാണ്. അവങ്കലേക്കുതന്നെയാണ് നിങ്ങളുടെ മടക്കം.(അൽ ബഖറ 245).

ദൈവ മാർഗ്ഗത്തിൽ ചെലവഴിക്കുന്നതിനെ കുറിച്ച് പ്രവാചക പ്രഭുവിന്റെ അന്വേഷണത്തിന്‌ പ്രിയ സഖാക്കള്‍ പ്രതികരിച്ച ശൈലി ചരിത്രത്തില്‍ സ്വര്‍‌ണ്ണ ലിപികളാല്‍ രേഖപ്പെടുത്തപ്പെട്ടിരിക്കുന്നു.

തികച്ചും പൂർണ്ണമായും സൗജന്യമായി ലഭിക്കുന്നതും നാളെ നമ്മെ കാത്തുകിടക്കുന്നതുമായ ശ്‌മശാനത്തിലെ ഒരു തുണ്ട് ഭൂമിയിലേക്ക് പോകുന്നതിനുമുമ്പ്‌ എല്ലാവരും ഒരു തുണ്ട് ഭൂമി ധാനം ചെയ്യാന്‍ തയ്യാറായാല്‍ പദ്ധതിയുടെ ആദ്യ ഘട്ടം കടക്കും.

രണ്ടാം ഘട്ടം . കെട്ടിടം നിർമ്മിക്കുക.
എല്ലാവിധ പഠനങ്ങൾക്കും വിധേയമാക്കി  കൊണ്ട് മികച്ച കൂട്ടുത്തരവാദിത്വം പുലർത്തി മാത്രം തുടങ്ങേണ്ടതാണ്.

പ്രാരം‌ഭ ചിന്തക്ക്‌ വേണ്ടി ചിലത് പങ്കുവെക്കാം.
 30 സ്ക്വയർ മീറ്ററിലുള്ള ഒരു കെട്ടിടത്തിൽ വേണ്ട ഏതാനും വിഭവങ്ങൾ.
ഒരു സൂചന മാത്രം.കൂടുതൽ ക്രിയാത്മകമായ ചര്‍‌ച്ചകളും കൂടിയാലോജനകളും അനിവാര്യമാണ്.

A.50 സീറ്റുള്ള ആധുനിക സജ്ജീകരണത്തോടെയുള്ള ശീതീകരിച്ച ഖുർആൻ ലാബ് .
ഈ ലാബ് താഴെ കൊടുത്ത വിവിധ ഉദ്ദേശങ്ങൾക്ക് പ്രയോജനപ്പെടുത്താം.
1.ഡിജിറ്റൽ ലൈബ്രറി
2.റീഡിംങ് റൂം
3.സ്മാർട്ട് ക്ലാസ്സ്
4.ട്രൈനിങ് ക്ലാസ്സ്
5.കല, സാഹിത്യം, സാംസ്കരിക ക്ലാസ്സ്
6.വിവിധ ലക്ചർ ക്ലാസ്സ്,
7.എൻട്രന്‍സ്സ് CA, സിവിൽ ഇതര പരീക്ഷ ക്ലാസ്സ്.
8.അങ്ങിനെ വിവിധ വിജ്ഞാന മേഖലയ്ക്കുള്ള ഒരു വിശാല ഹൈടെക് സംവിധാനം ഉണ്ടാകുക
9.പാരായണങ്ങളും, താളവും, മേളവും ശ്രുതിമധുരമായി ആസ്വദിക്കാനുള്ള ശബ്ദ സജ്ജീകരണം
10.വാർദ്ധ്യക്യം ഉപയോഗപ്രദമാക്കാനുളള കേന്ദ്രം.
11.ടോസ്റ്റാസ്റ്റോഴ്സ് (Toastmasters) ക്ലാസ്സ് etc.

B.ആരോഗ്യം
പത്ത് പ്രസംഗത്തിനേക്കാളും ഒറ്റ കായിക വിനോദം  മതി കുട്ടികളെ ആകർഷിക്കാൻ. അറിവും ആരോഗ്യവും ഒന്നിച്ചു ചാലിച്ചു കൊണ്ടു പോകാമെന്ന സവിശേഷത ഇതിനുണ്ട്. ഒരു ഇഞ്ച് ഇടം കളിക്കാൻ സ്ഥലം ഇല്ലാത്ത നാടായികൊണ്ടിരിക്കുന്ന നമ്മുടെ ശുദ്ധ ഗ്രാമങ്ങള്‍, ഇത്തരം സംവിധാനത്തോടെ പരിഹരിക്കാൻ കഴിയും. ചെസ്സ് മുതൽ ടെന്നിസ് വരെയും ബാസ്ക്കറ്റ്ബോൾ മുതൽ മിനി കാൽപന്ത്‌ വരെയും ബില്ലിയാർഡ്സ് മുതൽ സ്ക്വാഷ് വരെയും കൂടാതെ ഹെൽത്ത് ക്ലബ്ബും ഒരു കുട കീഴിൽ കൊണ്ടുവരാൻ കഴിയും.

C. വരുമാനം
മേൽ പറഞ്ഞതല്ലാം താങ്ങുന്നതിനും തുണയാകുന്നതിനും ആധുനികരീതിയിലുള്ള പീടിക മുറികളും ഭോജനശാലകളും ഉൾപ്പെടുത്തി ചിലവുകൾ കണ്ടെത്താനാകും.മറ്റു മാർഗ്ഗവും ചിന്തിക്കാം. കൂടുതൽ തെളിമയാർന്ന വ്യക്തതക്കും ആശയ വിശകലനത്തിനും ഒത്തിണങ്ങി കൂടിചേരാം കണ്ട്മുട്ടാം കേട്ട്മുട്ടാം കൂടിയിരിക്കാം പങ്ക്ചേരാം.

ചുരുക്കത്തിൽ ഇസ്ലാമിന്റെ നന്മയും അനുഗ്രഹവും മുഴുവൻ ജനങ്ങൾക്കും അനുഭവിച്ചറിയാൻ സാധിക്കുന്ന പദ്ധതിയാണിത്. ഇതിന്റെ ഗുണങ്ങൾ നാട്ടുകാർക്കൊക്കെയും അറിയാനും അനുഭവിക്കാനും അവസരമുണ്ടാകും. ഇതിലെ പങ്കാളിത്തം നന്മയുടെ പാതയിലെ ശരിയായി പ്രതിനിധാനം നിർവഹിക്കലാണെന്ന വസ്തുത വിസ്മരിക്കാവതല്ല. ഇസ്ലാമിലെ സകാത്തും സ്വദഖയുമായിരുന്നു എല്ലാ ജനവിഭാവങ്ങളുടെയും ആവശ്യ പൂർത്തികരണത്തിനും ക്ഷേമ പ്രവർത്തനങ്ങൾക്കും എന്ന ബോധവും ബോധ്യവും ഈ പദ്ധതിയെ അതി ശീഘ്രം പൂവണിയിച്ചേക്കും.

പ്രാർത്ഥനയോടെ,
അല്ലാഹുവിന്റെ നാമത്തില്‍...
ബിസ്‌മില്ലാഹി റഹ്‌മാനി റഹീം
സമർപ്പിക്കുന്നു.


മെഹബൂബ് പാടൂർ.
Share:

Manjiyil

Manjiyil
Manjiyil

Popular Posts

Blog Archive

Join Broadcast List

Name

Email *

Message *

Copyright © Udhayam | Powered by Blogger Design by PWT | Blogger Theme by NewBloggerThemes.com